1
Hasarın o yanı sükuta dalıb,
Göz açmağa qoymur külək bu yanda.
Alışqan tükənib, kibrit boşalıb,
Keçir şamın odu alışan anda —
Yaxşı hava olmur qəbiristanda.
2
Hasardan o yana toranlıq enir,
Hasardan bu yana qara boyanır.
Hasardan o yana behişt sərini,
Bu yanda hələ də daş, dəmir yanır –
Havası xoş olmur qəbiristanın…
3
Orda göy üzündə quş qatarlanır,
Qurğuşun səpilib sanki bu yanda.
O yanda qışda qar, yazda yağışlar,
Bu yan ya ilğımda, ya da dumanda –
Yaxşı hava olmur qəbiristanda.
4
Hasardan o yanda üfüqlər geniş,
Doğranıb, qapanıb fəza bu yanda.
Hasardan o yanda gəliş, həm gediş,
Burda daşa dönüb durub zaman da –
Fəsillər dəyişmir gəbiristanda…
20-25 sentyabr 2007-ci il, Samara
Реклама
