Anamın xatirəsinə
Anasının başı qarışan zaman,
Gün gedir, uşaqsa yığışmır evə.
Nəfəsi təngiyir, doymur oyundan,
Yeməyin, yatmağın vaxtı keçsə də.
Dünya oyunları çəkdi məni də,
Girə də bilmədim, baxıram ancaq.
Qatara gecikdim, batıb gəmim də,
Olduğum yerin bir adı var – “Uzaq”!
İndi səsin yatır xatirələrdə,
İl üstə il gəlir, yox çağıranım.
Haçansa ayılıb səsləsən əgər,
Gəlib baş qoyaram sənin yanına…
28.08.17
Samara
anamın xatirəsinə
Yatağın yığılıb, boşdur otağın,
Xatirələrdəsən bir ildir ki sən.
Daha bir adama yox ağırlığın,
Hamıya əzizsən indi, şirinsən.
Nə qəlbin, nə canın ağrıyar daha,
Nə suya, çörəyə ehtiyacın var.
Nə gündüz gözlərin baxar yollara,
Nə də səksəkəylə keçən gecən var.
Gedib hər azarın xatirələrdə,
Sən əlsiz-ayaqsız qarı deyilsən.
İndi xatirənə hamı gəl deyər,
Yatağın yığılıb, boşdur evinsə…
27.08.2016
Samara
ANAMIN XATİRƏSİNƏ
8
Qocanın atılmışı –
Sənə asanmı gəlir?
Səhərin açılmamış,
Qərib axşamın gəlir.
Çay-çörəyin gecikir,
Şişir, udulmur tikə,
Süfrənə elə bil ki,
Öd dolu camın gəlir.
Gözün yola zillənir,
Sözün öz-özünlədir.
Nə yazan, nə zəng edən,
Nə bir adamın gəlir.
Məmə, yaz gəlir yenə,
Qəbrin otla bürünər.
Getdi qara günlərin,
Qara bayramın gəlir.
27.02.2016 Samara
HACINIIN XATİRƏSİNƏ
Hər yazımı bəyənən,
Əzbərləyən Hacıydın.
Yazıma “əsər” deyən,
Yeganə oxucuydun.
Danışsaydım hər nədən,
Susub qulaq asardın.
Təkcə səndin kəsməyən,
Sözümü yarısında.
Təkcə sən məni yekə,
Bir sənətkar sayırdın.
Sənin gözündə bəlkə,
Mən ağıl dəryasıydım.
Dünyaya gəlmişlərin,
Ən həqiri indi mən.
Sənin qiymətin imiş,
Məni ucaldan demə.
Yoxsan – yox oxuyanım,
Eşidənim yox daha.
Sən yoxsan, ən yaxınım,
Mənə səndən uzaqdır…
07.01.2016 Samara
Nə boyda oxşar idim
Sənə, nə yaraşıqda.
Yoxsan – oxşarıq indi,
Qardaş, eyni yaşdayıq.
ANAMIN XATİRƏSİNƏ
6
Əlimi sinənə qoyub bir ara,
Biləyini sıxdım – nə nəfəs, nə nəbz.
Boynunda haçandan çırpınan damar,
Dərinin altında indi görünməz.
===============
Öpdüm yanağından – soyuyub gedib,
Gedib can istisi, yay istisi də.
Mənimsə alnımı bir öpüş yeri,
Yandırar, ömürdən illər ötsə də…
04.10. 2015 Samara
istəkli xalaqızı Leylanın xatirəsinə
Uşaqkən əzizlənən,
İlkin, birinci idin.
Bacın dünya gözəli —
Bəlkə də inciyirdi,
Sən ki gözəl deyildin…
Danışmağın, gülüşün,
Yapışıqlı, şirindi.
Harda olsan, həmişə,
Sevildin, bəyənildin –
Çox da gözəl deyildin!
Nağıl deyilmiş həyat —
Sınaqlara çəkildin.
Unutqanlıq, xəyanət,
Soyuqluq nədi, bildin –
Sən ki gözəl deyildin!
Ağ ulduzlar yananda,
Göylərə sən çəkildin.
Gözəllik bu dünyada,
Niyə azalıb indi? —
Sən ki gözəl deyildin…
19-20.09. 2015 Samara
ANAMIM XATİRƏSİNƏ
3
Qəbrini tez qazdılar,
Çadırın tez düzəldi.
Dedilər bir ağızdan,
Mərasimin gözəldi.
Yaxınlar yığışdılar,
Uzaqdan da gəldilər.
Bir azca ağlaşdılar,
Sonra deyib-güldülər.
Sən indi tək deyilsən,
Ağrı da yox canında.
Sən indi dincəlirsən,
Hamı da arxayındı…
14.ş9.2015 Samara
05.09.2015 Salyan
3 avqust 2015, Ərəbqardaşbəyli
