Balığı dəryaya atmışam, indi,
Özümdən razıyam, qayğılıyam həm.

Balığın dili yox, sular dərindir,
Xaliqə çatarmı bu iş – bilmirəm…

 +

Bu xaliq söhbəti bəlkə də yalan,
Elə yaxşılıq ya eləmə — birdir.

Kimdir hesab çəkən, yazıya alan?

Yemədin, buraxdın, yedin – kim bilir?

 +

Bəlkə dilsiz balıq metaforadır,
Əvəz iztəyənə yaxşılığından:

Birinin qolundan tutub qaldırır,
Gözləyir qoşulsun adına dastan…

11.11.23, Samara