Napoleona aid edilən buir ifadə var: “Hər hansı rusu qaşısan, altdan tatar çıxar”.
Azərbaycanda hər hansı şiə məzhəbli din xadimini, ruhanini “qaşısan”, Xomeyni aşiqi, molla dövləti tərəfdarı aşkara çıxar.
Cənab Abid Qafarov İranda fahişəliyi təsadüfən şah dövrü ilə bağlamadı, fahişəliyin ləğvini 1979-cu ildən götürməyi də təsadüfi deyil: 1979-cu ildə Xomeyni hakimiyyətə gəldi. Az keçməmiş bütün demokratlara, liberallara divan tutulmağa başladı. Qaça bilənlər canlarını qurtardılar, qaça bilməyənlər dar ağaclarından asıldılar ya türmələrdə çürüdülər.
Fahişəlik ləğv olundumu?
İki sitat. Rus dilindədir, tərcüməsini də verirəm.
«В 2002 года иранская газета Entekhab подсчитала, что только в Teгеране находится 85,000 проституток».
(https://ru.wikisexguide.com/wiki/%D0%98%D1%80%D0%B0%D0%BD)
Entehab qəzetinin hesablamasına görə, 2002-ci ildə Tehranda 85 000 fahişə olub.
“Точное количество проституток, работающих в Иране, приблизительно на 2017 год в Иране было 228,7 тысяч проституток[103].
(https://ru.wikipedia.org/wiki/%D0%96%D0%B5%D0%BD%D1%89%D0%B8%D0%BD%D1%8B_%D0%B2_%D0%98%D1%80%D0%B0%D0%BD%D0%B5)
Vikipediyaya inansaq, 2027-ci ildə İranda 228, 7 min fahişə olub.
İrana gedib-gələnlər, əgər obyektiv və gözüaçıq insanlardırsa, bunu təsdiq edərlər.
Siğəni də fahişəlik saysaq, fahişələrin sayı milyonu keçər…
Mənim baxdığım mənbələrdə Azərbaycandan (bizim Azərbaycandan) müxtəlif yollarla aparılan qızlar və qadınlar da İranda fahişəliklə məşğul olurlar.
Mən Abid Qafarovun “Tərtər işindəki” fəaliyyətini qiymətləndirirəm, ancaq onu təhlükəli insan sayıram. Müstəbid rejimə müqavimət zəruridir. Ancaq bu cür cinayətləri açmaq üçün islamçıların fitvasına uymamalıyıq. Abidlər hakimiyyət başına gəlsələr, əlbəttə, beş-on adamı məsuliyyətə cəlb edib cəzalandırarlar. Sonra nə olar? Sonra Xomeyni İranda nə etmişdisə, o olar. Dar ağacları, zindanlar, qonşu ölkələrdə terrorçuluq işləri, sanksiyalar, şəxsi azadlıqların boğulması, sayı milyonlar olan milli azlıqların hüquqsuzluğu və s. Tərtər cinayətinin üstü Xomeyni aşiqlərinin yardımı və iştirakı olmadan da açılmalıdır, cəmiyyətdə belə potensial var. Bir vaxt İran demokratları, liberalları Xomeyni aşiqi olub onu hakimiyyətə gətirdilər. Xomeyni ilk növbədə elə o adamlara divan tutdu.
Xomeyni zəngin, ecazkar İran musiqisini, İran ədəbiyyatını, kinosunu məhv etdi. Qüdrətli tarixi olan, özəl sivilizasiya yaratmış xalq əbalıların, çalmalıların girovu və qurbanıdır.
Abid Qafarovdan elə tünd Xomeyi qoxusu gəlir ki, hətta televiziya ekranından da adamı vurur. İslam fəallarının demokratiya qurmaq iddiası Əzrailin uşaq paylaması haqqında lətifəni xatırladır…
Bunəqədi polisini, Nərimanov məhkəməsini, Kürdəxanı türməsini müsəlman İranın dar ağaclarına dəyişmək arzusu nə dərəcədə rasionaldır?
Abid Qafarovun arzuladığı «əxlaqi dövlət» yaransa, dar ağacları hökmən olacaq. Necə ki, İranda, Əfqanıstanda, Pakistanda var. Rafiq Tağını şiə qoçular bıçaqlayıb öldürəndə Hacı Tale Bağırzadə məsciddə sevinclə elan edirdi ki, «Rafiq Tağı cəhənnəmə vasil oldu». Məscid əhli «ləbbeyk» deyirdi. (https://xeyrulla.com/2016/05/06/haci-tale-bagirzad%C9%99-c%C9%99h%C9%99nn%C9%99m%C9%99-vasil-olmus-rafiq-tagi/
Abiq Qafarovu Tale Bağırzadəni qınamışdı?
Demokratiya və İslam bir araya sığan şeylər deyil. Demokratiya – prosedurdur. İslam isə heç bir prosedur tanımır. İslamın Konstitusiyası Qurandır. Quran həm Konstitusiyadır, həm cinayət məcəlləsidir, həm mülki məcəllə. Demokratiya seçmək və seçilə bilməkdir, bütün insanlar bərabərdir, hər kəsin bir səsi var. Quranla tanış olanlar bilirlər ki, İslam qadını kişiyə bərabər saymır, hətta vərəsəlikdə də qadın kişi ilə bərabər deyil. Dörd arvad ala bilən kişi qadınla bərabərdirmi? Quranın cinayət məcəlləsi olan hissəsi qisas buyurur, oğurluq edənin əlini kəsməyi buyurur. Quran buyurur ki, ər vaxtaşırı arvadı kötəkləsin. Avropa demokratiyasının mərkəzlərindən biri, anqlo-sakson hüquq sisteminin beşiyi olan ölkədə oturan Qurban Məmmədli nə istədiyini özü bilirmi? Və ya özü çoxdan dolaşıb, ona etibar edənləri də dolaşdırır?
İslam yarandığı gündən dini təlim olmaqla bərabər dövlət ideologiyası olub. Quranıdakı bir sözü belə dəyişməyi mümkün saymayan insan ancaq müsəlman dövləti arzulaya bilər. İslam dövlətinin nə və necə olduğunu isə İranda, Əfqanıstanda görürük. Dini dövlət isə — fəlakətdir, insana doğuluşdan məxsus azadlıqdan mərhum olması deməkdsir. Abid Qafarov da, Qurban Məmmədli də bunu görürlər. Ancaq sadəlövh insanların beynində və qəlbində xaos yaratmaqda davam edirlər.
Geydiyi virtual moizəçi əbasında Qurban Məmmədli elə havalanır ki, çatda onun fikrinə ürkək şəkildə də olsa etiraz edənləri aqressiv formada təhqir edir, onları «rejimin nökəri» adlandırır. Belə bir adam yüksək vəzifə başında özünü necə aparar? Ağanəzərəm, Ağanəzər…
Qurban Məmmədli başa düşmür ki, müsəlman əbası geyməklə, dini ritorikanı silaha çevirməklə on minlərlə, bəlkə yüz minlərlə potensial həmfikrini özündən narazı və hətta qaçaq salır. Qurban Məmmədli müasir Azərbaycan cəmiyyətini yaxşı tanıyırmı? Gənclərin, gəncliyin dinlə münasibəti barədə sosial tədqiqatlara əsaslanan təsəvvürü varmı? Mənə elə gəlir ki, yoxdur. Qurban Məmmədlinin auditoriyasının əsas hissəsi azsavadlı insanlardır, bunu yazılan şərhlərdən görmək olar. Bu, faktdır və Qurban Məmmədlinin öz abunəçiləri barədə bol tərifləri onu inkar edə bilməz. O ki qaldı xaricdəki, əsasən Rusiyadakı azərbaycanlılara, onların (yaşlılarının) arasında müasir təhsilli, demokratik baxışlı insanlar tapmaq çətindir. Gənclərin əksəriyyəti isə ya tamam, ya qismən ruslaşıb, Azərbaycan siyasəti ilə maraqlananlar yox kimidir, onlar üçün Azərbaycan müasir kefxanaları, geniş çeşidli əyləncələri olan Bakıdır…
Gördüyü işi son vaxtlar izləyib tənqidi, hərdən isə çox tənqidi yanaşdığım Tural Sadıqlının izləyicilərinin sayı Q. Məmmədlinin abunəçilərinin sayından 5 (beş!) dəfə çoxdur. Sabah Tural da mollalığa başlasa, izləyicilərinin yarısı qaçmazmı?
Abid Qafarov hardadır? İranda? Əfqanıstanda? Səudiyyə Ərəbistanında?
Təsadüfən, lövbərini Avropada atmayıb ki?
X.X.
11. 03. 2024, Samara
P.S. Abid Qafarovun Qafqaz müzəlmanları idarəsinin korrupsioner və lotu rəhbərliyinə qarşı haçansa çıxış etdiyini bilən varmı?
X.X.
P,S,S. Maraqlananlar üçün Tale Bağırzadınin dedikləri:
“And olsun Allaha, İmam-Zaman gəlsə, Bu gün Yəmən hazırdır ağanı qəbul eləməyə!”
“Bu gün İran İslam Respublikası Başda Rəhbərimiz ayatulla Xamanei olmaqla hazırdır ağanı qəbul eləməyə!”
“Bu gün Azərbaycanda o şəraiti yaratmışıq ki, İmam-zaman təşrif gətirsin bura?”
“O şərait yaranmalıdır Azərbaycanda. O ruhiyyə yaranmalıdır ki, imam zaman təşrif gətirsin bura!”
“Şükür olsun ki, bu ruhiyyə bu kənddə var”.
“Bu ruhiyyə bu kəndlə məhdudlaşmamalıdır”
“2002-ci il deyil ki Nardaranda təkbaşına mübarizə aparsın”.
“Kəndlərimizdə çoxlu Hüseyn təfəkkürlü gənclərimiz var!”
“Ağanın gəlişinə hazırlaşmağın çoxdan vaxtıdır!”
«CƏBHƏ»ÇİLƏR DƏ AZƏRBAYCANI «İMAM-ZAMAN»IN GƏLİŞİNƏ HAZIRLAYIRLAR?
xeyrulla xayal 