İNDİ KEÇƏL HƏMZƏLƏR TOP OYNADIRLAR…

Maradona əliylə qol vurandan sonra futbolda lotu-potuluq erası başlandı. İndi dünya stadionlarında Koroğlulat yox, Keçəl Həmzələr top oynadırlar…

KEÇƏL HƏMZƏ

Реклама

300 spartalı və 350 salyanlı

Üç yüz əlli salyanlı İlham Əliyevə məktub göndərib xahiş edirlər ki hüquq müdafiəçisi Emil Məmmədovu azad eləsin.

Vallah, bu salyanlaılardan elə işlər çıxır ki, adam məəttəl qalır. A balam, İlham Əliyev məktub oxuyur? Yəni by salyanlılar fikirləşirlər ki, İlham Əliyev bu dünyanın keflərini qoyub onların məktubunu oxyacaq və oxuduqca da başını yelləyib deyəcək: “Mehriban, deyirlər salyanlılar ağ işlədirlər, qara işlədirlər, hamısı yalandır, gör nə məktub yazıblar! Zırıltı!” Mehriban xanım da deyir: “İlham, oxuyandan sonra cırıb atma, ver mən də oxuum…”

İndi mən fiikirləşirəm ki, bu 350 salyanlı məktub imzalamaq əvəzinə niyə gedib  Emil Məmmədovun yatdığı türmənin qabağına yığılmır? Ya niyə Bakıya gedib prezident idarəsinin qabağında nümayiş keçirmir?

Vallah, prezident İlham Əliyevə xahiş ərizəsi yazan insan dəlidir. Və o 350 salyanlı qoy allaha şükür eləsinlər ki, aparıb onları dəlixanaya salmırlar…

Ya da kabinetini qlobus bəzəyən çoban görkəmli icra başçısına sağ ol desinlər…

 

Mirzə ƏLİL

21.05.2014

CANIM QAYINATA…

lham Əliyev Arif Paşayevə “istiqlal” ordeni verib. Fərmanda deyilir:

Canım qayınata, gözüm qayınata,

Sən mənə anasan, sən mənə ata.

Mən “papa” deyirəm sənə hörmətlə,

Bağrıma basıram səmimiyyətlə.

“İstiqllal” ordeni verirəm sənə,

Yeni bəzək vursun geniş sinənə.

Gözəl millətimi işin ucaldır,

“İstiqlal” ordeni sənə halaldır.

Vaxt olub şir kimi girib Meydana,

Atmısan özünü tankın altına.

Cəbhədə qanını  axıtmısan sən,

Düşmən ordusunu dağıtmısan sən.

Kim deyir sən xalqı soyursan, papa?

Xalq üçün canını qoyursan, papa!

 

15.02. 2014

 

 

RAMİZ MEHDİYEVLƏ DOST OLUN, XEYİR GÖRƏRSİZ!

Prezident administrasiyasının rəhbəri akademik Ramiz Mehdiyev Facebookda səhifə yaradıb. Səhifə yaranan kimi onu minlərlə insan bəyənib. Səhifənin böyük müalicə əhəmiyyəti var. Bu səhifə onu bəyənənləri çopurluqdan, gözüqıyıqlıqdan, babasildən, qarınağrısından, dazlaşmadan müalicə edir. Akademik Mehdiyevin səhifəsi kişilərin potensiyasını da birə beş artırır. Səhifəni bəyənən arvadların mollaya gedib sevgi duası yazdırmağa ehtiyacı yoxdur, çünki səhifə özü yolunu azmış ərləri dinə-imana gətirir.

Səhifəni üç dəfə bəyənənlərin maaşı artır, beş dəfə bəyənənlərin lotoreyası udur. Lerik rayonunun dağ kəndlərinin birinin sakini Ramiz Mehdiyevlə Facebookda dost olan kimi inəyi ekiz doğub.

OYUNUNUZ OLSUN, A SALYANLILAR…

Bu yaxınlarda Salyanda bir vur-çatlasın olub ki, gəl görəsən…

İqtidarla müxalifət bir yerə yığılıb Rəsulzadənin yubileyini keçiriblər. İcra başçısı, prokuror, hakim, polis rəisi, notarius, türmə rəisi, VVAQ müdiri, azpetrol, yol müfəttişi, cəbhə, müsavat…Hamı qol-boyun olub, bir marçamarç düşüb ki, şadlıq evinin yanından keçənlər elə biliblər içəridə erotik film göstərirlər…

Süfrədə də dünyanın bütün naz-neməti…Balıq da olub, kürü də olub, ağ da olub, qara da olub…

İcra müxalifətin sağlığına vurub, müxalifət icranın… Bir vurhavur olub ki…

İki dəfə yüngül dava düşüb. Bir dəfə ideoloji zəmində, bir dəfə də oynamaq üstündə. İki nəfərə kəllə, üç nəfərə bıçaq vurulub. Zərərçəkənlərə elə ordaca icra başçısı şəhid statusu verib.

Yeyib-içmək səhərəcən çəkib. Səhər açılanda gülləri götürüblər ki, aparıb qoysunlar Rəsulzadənin abidəsinə. Yadlarına düşüb ki, Rəsulzadənin Salyanda abidəsi yoxdur. İcra başçısı deyib ki, hələlik gülləri qoyaq öndərimiz Heydər Əliyeviin abidəsinə, qalsın, haçan Rəsulzadəyə abidə qoyular, gülləri aparıb qoyarıq ora. Elə də ediblər…

Sonra icra başçısı gedib öz idarəsinə. Müxalifətçlərdən bir neçəsi də düşüb onun dalınca ki, biz daha qardaşıq, bizə də idarədə bir yer ver.  İcra başçısı polislərə göz eləyib, polislər üzlü müxalifətçilərə bir neçə yağlı dəyənək çəkib qaytarıblar….

Bu əhvalatı icra başçısı telefonla İlham Əliyevə danışıb. İlham əliyev o qədər gülüb ki, az qalıb qarnı cırıla…

 

05.02. 2014-02-0 Samara

 

Mirzə Əlil

XALQ HAÇAN OXUDU Kİ, XALQ MAHNISI OLA?

Bizim millət özünü Qarabağdan başqa bir də xalq mahnıları uğrunda qurban verməyə hazırdır. Getdiyin yerdə birdən böyrünə bir dümsük verib saxlayırlar.

— Mirzə, eşitdin də.

— Nəyi eşitdim, a bala?

— Necə nəyi, a kişi, fil qulağında yatmısan? Düşmənlərimiz yenə xalqımızın mahnısını oxuyub öz adlarına çıxdılar…

Vallah, heç bilmirsən nə deyəsən… Mən bilmirəm xalq mahnısı nə olan şeydir. Çünki ağlım kəsəndən xalqımızın mahnı oxuduğunu görməmişəm. Gürcü xalqı hə, arvadlı-kişili yığılıb səs-səs verirlər, oxuyurlar. Bizim xalq oxumur. Bizdə mahnıları manıslar oxuyurlar. Bir manıs sintezator çalır, o biri manıs oxuyur. Bunlar hardan xalq oldular?

Başqa yerləri bilmirəm, bizdə nəinki oxuyanı, hətta zümzümə edəni də həmişə lağa qoyublar. Kişilər yenə heyvan-zad otaranda kola girib aman-aman deyərdilər, qadınlar heç oxumazdı, çünki oxuyan qadın pozğun sayılırdı. Qabaqkı arvadlar körpələrə layla çalardılar, indikilər deyəsən bunu da eləmirlər. Saqqız çeynəyə-çeynəyə seriala baxan gəlin necə oxusun?

Əlbəttə, haçansa xalq oxuyub, bunu danmıram. Amcaq neçə illərdir ki, xalq ancaq mələyir, çünki xalqı mələdirlər. Oxumaq istəyən xalq gərək mələməyi tərgidə, qoymaya onu mələdələr…

Kim nə deyir desin, mənim fikrimcə, oxumayan xalqda xalq mahnısı olmaz. O ki qaldı mahnıdan ötrü yağı düşmənlərlə vuruşub qan tökməyə, qoy manıslar gedib vuruşsunlar. Bəlkə sayları da bir qədər azala…

Mirzə Əlil

04.02. 2014 Samara

KİM KİMİ TOYUQ SAYIR?

Mən bir felyetonun adını qoymuşdum “Azərbaycan toyuqların vətənidir”, Samaranın qeyrətli azərbaycanlıları məndən incimişdilər, hətta məni öldürmək istəyən də olmuşdu, onların fikrincə, mən qəhrəman  millətimizə “toyuq” demişdim. Hərçənd mən igid millətə toyuq deməmişdim, demişdim ki, ilk toyuq Azərbaycanda olub, deməli, ilk yumurta da Azərbaycanda olub, bununla sübut edirdim ki, Azərbaycan toyuğun, yumurtanın və … tortun vətənidir, yəni İlham Əliyevin şərəfinə Qarabağ ərazisi boyda tortun bişirilməyi təsadüfi deyil…

Seçkilərdən sonra bu məsələ məndə bir az şübhə yaradıb. Deyirəm bəlkə elə bizim millət doğrudan da toyuq millətdir? Belə deyilsə, niyə seçki kampaniyası 21 gün çəkir?

 

Mirzə Əlil

14.10.2013 Samara

BİZNESMEN AXTARIRIQ YOXSA HƏRİF?

Deyirəm son zamanlar Xalaqlar dostluğu evinin  qabağından heç olmasa bir dəfə keçən adama Parisə gedib avtomobil salonuna baxmaq lazım deyil. Çünki milli təşkilatların üzvlərinə məxsus maşınları içində elələri var ki, onları avropalılar bir-iki il bundan sonra görəcəklər. “Minəcəklər” demirəm, çünki bu avtomobillər elə qiymətədir ki, onları almağa bəlkə heç ingilisin, almanın gücü çatmaya… Və bu avtomobillərdən an gözəllərinin, ən bahalılarının bizim soydaşlarımıza məxsus olduğunu biləndə ürək fərəhdən elə çırpınır ki az qalır qırılıb düşı ayağının altına…

Ancaq bir iş var ki, bu avtomobil sahiblərinin çoxu idarənin qapısından keçib ofisə girən kimi ciblərindən bahalı bir dəsmal çıxarıb başlayırlar dizlərinə vura-vura ağlamağa ki, bəs qırıldıq-öldük, böhran qırdı belimizi, arvad-uşağı göndərmişik Azərbaycana ki, bağda-bostanda əllərinə keçəndə dişlərinə çəkib dolansınlar…

Mənə nə deyirsininz deyin, mən biləni,  ya ofisimizə, ya təşkilatımıza cadu eləyiblər, restorandan çıxıb ofisə gələnəcən soydaşlarımız müflis olurlar. Bir az ağlaşandan, sinə döyəndən sonra üzlərini sədrə tutub derirlər: “Vəziyyər gərgindir. Millətdən olan biznesmenlərlə danışmaq lazımdır ki, bir az təşkilata əl tutsunlar”. Adamın da üzü utanır desin ki, a bala, sən bəs biznesmen deyilsən? Yəni beş kilo benzinin pulunu da verə bilmirsən? Vallah, qalırsan kəsilə-kəsilə, deyə bilmirsən, çünki indi bunların oruc tutanı tutub, tutmayanı da özünü vurub tutmuşluğa, oruc adam da acıqlı olur, söz deyərsən, qayıdar üzünə. Durub hələ başını da yarar…

Bizim millətin fatihə oxumağı tamaşadır. Sağ əliylə çənəsinə sığal çəkir, üzünü tavana tutb başlayır dodaqlarını tərpətməyə. Mirzə Cəlil deyirdi ki, Xudayar bəy bu halda dua-zad eləmirdi, tavanın pərdilərini sayırdı… Bizim ofisdə üzünü yuxarı tutanda Allahın göyünü yox, tavandakı elektrik çıraqlarını görürsən. Və dilinə Tanrı adını gətisib bu çıraqları görən insan gərək yadına sala ki, bu yekə otağı bizə rus hökuməti verib, o çıraqları da tavandan rus hökuməti asıb ki, kitab oxuya bilək, qəzet oxuya bilək, bir-birimizin üzünə baxa bilək və bu işıqların pullarını da rus hökuməti verir, hələ qışda rus hökuməti bu yekəlikdə otağı yaxşıcaq qızdırır ki, biz vacib yerlərimiz soyuğa verib xarab eləməyək, bu rus hökuməti ofisə İnternet də çəkdirib ki, ermənilərin Şuşada, Zəngilanda gördüyü quruculuq işlərindən  xəbər tuta bilək, bu rus hökuməti hələ süpürgəçiyə də pul verir ki, ayağımızın altını süpürüb-yusun…

Və bütün bunları yadına salan soydaşımız üstəlik bu idarənin qabağına bahalı maşınla gəlibsə, gərək beş-on min rubldan ötrü ayrı adam axtarmaya. Əgər biz azərbaycanlılığımızı, dilimizi, ruhumuzu saxlamaq üçün yığışırıqsa, bunun xərcini kim çəkməlidir. Onsuz da zərcin çoxunu rus hökuməti çəkir. Çatmayan beş-on min pulu yığmaqdan ötrü bəlkə gedib yol qırağında dayanaq?

 “Biznesmenlərlə danışmaq lazımdır!” – bizim bəzi fəalların son beş-altı ildə gördüyü iş ancaq bu təklifdən ibarətdir. Nə çalmaqları var, nə oynamaqları, nə yazmaqları, nə oxumaqları, bahalı kostyumda, qalstukda gəlib “ağıllı” təkliflər edirlər. Vallah, adamın üzü utanır deməyə ki, təklifini qatla qiy cibinə, varınsa, beş qəpik at ortaya… Deyə bilmirsən, çünki soydaşımız təklifini verən kimi sağ əlini üzünə çəkib gözlərini zilləyir tavana, guya dua oxuyur, ancaq əslində rus hökumətinin asdığı çıraqları sayır… Hə, əziz soydaşlar, vəziyyət gərgindir, pul yoxdur, əlac qalıb ki, biz Azərbaycan milli pulu lopaqla işləyək. Ancaq rus bankları lopaqla hesab açmırlar, mətbəə “Ocağ”ı lopaqla çap eləmək istəmir. Bu, açıq-aşkar ayrıseçkilikdir. Gərək Avropa məhkəməsinə şikayət yazaq… Tərslikdən indi evdə də davadır. İlham Əlieyev 150 Azərbaycan jurnalistinə ev verib mənim evimi yıxdı, yəni yıxılmalı bir evim yoxdur, günüm olub qara. Arvad durub üzümə ki, sən də Azərbaycan jurnalisti olsaydın, indi biz də Bakıda prezidentdən ev alardıq, Rusiyada kirələrdə çürüməzdik. Deyırəm ay arvad, Azərbaycanda neçə min jurnalist var, onların hamısına elə bilirsən ev verirlər? Ev almaqçın gərək prezidentə elə təriflər deyədən ki, indiyəcən insan qulağı eşitməmiş olsun. Mən də qocalmışam, tərif deyən vaxtım keçib, cavanlarla ayaqlaşa bilmərəm. Arvad da deyir ki, sənin elə cavanlığın da bir şey olmayıb, cavanlıqda da tərif deyə bilmədin ki, qaldıq bu günə…

Orası elədir, arvad da olsa, düz deyir…

 

Mirzə ƏLİL

“Ocaq” qəzeti, iyul 2013

 

 

 

 

 

 

DƏYƏNƏK ƏHVALATI

Azərbaycan polisləri möhtərəm prezident İlham Əliyevə şikayət yazıblar ki, polis dəyənəklərini onlara 5 manata satırlar. Çox polisin rezin dəyənəyi almağa gücü çatmır, ona görə də ağacdan kəsib düzəldirlər. Bəzi polisləri dəyənəyi söyüddən, bəziləri heyvadan, bəziləri palıddan kəsirlər. Talış polisləi dəyənəyi dəmirağacından düzəldirlər, çünkü cənub bölgəsinə gəlməyə cəhd edən müxalifətçiləri ancaq dəmirağacıyla vurub qaytarmaq mümkündür. Salyanda ağac-uğac az olduğundan Salyan polisləri dəyənəyi yulğundan düzəldirlər, sınan şey deyil, müsavatçı bu cür dəyənəyi uzaqdan görən kimi oriyentasiyasını dəyişir, “YAP”a keçir. Bəzi Salyan polisləri dəyənək əvəzinə bıçaq gəzdirirlər. Naxçıvanda zoğal ağacından dəyənək yaman dəbdədir, çünki Xudayar bəyin zamanından bilirik ki, zoğal dəyənəyinin misli-bərabəri yoxdur, bir insana bir dəfə vuran ki, bağırtısı ya İrandan, ya Türkiyədən, ya da Rusiyadan gəlir. Amcaq zoğal dəyənəyi hər polisdə olmur, komandirlərdə olur, sadə polislər dəyənəyi ərik ağacından düzəldirlər…

Belə-belə işlər… 

Mirzə ƏLİL

GÖZÜNÜZ AYDIN, KÜRÜ ZƏNBİLDƏDİR!

Azərbaycan vətəndaşları indən belə nəinki balıq, hətta kifəyət qədər kürü də yeyə biləcəklər. Prezidentin fərmanıyla istehlak zənbilinə 8 kq kürü salınıb. Badımcan yetişən kimi millət kürü yeməyə başlayacaq.