Deyərsən təzədən çəkiləcəkdir
Çexov hekayəsi — kastinq, sınaqlar,
Bütün küçələrdə elə bil gedir.
Anna Sergeyevna hər birində var.

 +

Gedir həndəvərə salmadan nəzər,
“İt gəzdirən xanım”  fikirli, ciddi,
Onu ləngimədən ağ şpis izlər,
Qurov da oturub pusquda indi…

 +

Hamısı ağ deyil, yox, şpislərin,
Qarası, sarısı, xurmayısı var.

Əsr əksi deyil Çexov əsrinin,
Yox eşq romanları, yox o xanımlar…

 +

Modadır qayıdan uzaq əsrdən!
Dönüb vaxtaşırı qayıdır axı,
Yüz il, yüz əlli il düşüb nə dəbdən,

Çoxdan sandıqlarda qalanlar çıxır.

 +

İtlər də yaşayır dəbdəyişməni,

Dəbdən düşəni var, dəbə düşən var.

İnsan nə axtarır? – maraqlı, yeni,
Yeni bəzən nədir? – unudulanlar…

 +

Dünən əzizlənənən balonkalardı,
Kolli, labradordu, spanieldi.

İki itdən biri pudel olardı.

Hanı o pudellər? – yoxdular indi.

 +

Hər iki xanımdan indi birinin,
Yanında, dalınca şpisdir qaçan.

Çoxalıb aşiqi retriverlərin,
İt nə it! – ağlına mat qalır insan…

 +

Həmişə çiylik var, çirkinlik də var,
İnsanın itlərə məhəbbətində.

Bu gün əzizləyər, sabahsa qovar,
Xidmət tələb edər, əylənər həm də.

+

Qabaq kitablardı, kino indisə,

Dəbi dəyişdirən cinsinə itin.
Seriala baxan düşür həvəsə,

İt alır – həyatı kinodur indi.

 +

“İnsandan yaxşıdır it” – demə ancaq.

Yal ona yalayıb-öpmək öyrədir,

Sədaqət göstərib biz də yal alsaq,
Bilirik ki, kimik, adımız nədir…

 

27-28.09. 2023, Sanara