Paltaryuyan maşın və ya qabyuyan,

Kompüter, telefon, avtomobil al — 

Hər şeyin üstündə kitabçası var

Ətraflı işlətmə qaydalarıyla.

 +

Başa salır hara taxasan nəyi,

Tərsi ayırasan avanddan necə,

Necə salmayasan maşını gücə,

Necə saxayasan aldığın şeyi.

 +

Dərman satışına indi biz baxaq:
Ətraflı təlimat hər birində var.

Düzdür, oxuyanda başı ağrıdar,

Vacibdir diqqətlə oxumaq ancaq.

 +

Söz-söz oxuyaraq çalışır insan,

Bir nöqtə, bir vergül gözdən itməsin,

Qarınçın olanı başçın içməsin.

Az deyil lap əzbər yadda saxlayan.

 +

Dini təlimləri götürək indi.

Əlbəttə, tanışsa bizə hansılar.

Nəyi necə etmək qaydaları var,
Əslində onların hər birində də.

 +

Nəyi hara taxaq, haçan nə yeyək,

Nə səbəblə içmək olar ya olmaz,

Kimlə dostluğumuz günah sayılmaz,

Kimlərlə oturub-durmayaq gərək…

 +

Biz özümüz əşya, həyat da şeydir,

Nəyi, necə etmək kitabı da var.

Amma nədənsə xoş ömür-gün yaşar,

Kim nəyi, necəni tərsavand edir…

13. 08. 2025, Samara