Архив тегов | İslam haqqında şeir

İSLAM

Фев10

İşıq var —  mənbəyi zəka, ağıldır,
Var iti tiyədən yarananı da.

Gur işıq parlayıb zülməti yardı,
Bir zaman ilğımlı yarımadada.

 +

Neçə minlər idi qılınc tiyəsi,

Oynayır, şimşək tək çaxır hər biri.

Tiyə işığını tiyə yiyəsi,
Tutaraq durmadan gedir irəli…

 +

Zəka işığı da, şübhəsiz, yanıb,
Sübutlar az deyil – səhih, tarixi.

Bəs bu qaranlığın mənbəyi hanı? –

Niyə büdrəyirik kor kimi axı?

 +

Bir zaman Çernobl stansiyası,
Məgər deyilmiydi işıq mənbəyi?

Elə ki, baş verdi nüvə qəzası,
Külə çevirdi o, canlı hər şeyi…

 +

Biz haçan qəzaya uğradıq belə? —
Yada təhlükəyik, özümüzə həm.

Çalma əsarəti, vətəndaş – kölə,

Ölkə türmə kimi – qıfılı möhkəm.

 +

Kimlər cəhənnəmə çevirib belə

Möhtəşəm  İranı, əvəzindısə,
Ərəb cənnətini vəd edir hələ? —

İransa qan qusan vərəmli xəstə…

 

 

10. 02. 2026, Samara

QURANIN NÜSXƏLƏRİNİ YANDIRMIŞ SALVAN MOMİKANIN ÖLDÜRÜLMƏSİ İLƏ BAĞLI DÜŞÜNCƏLƏR

Фев1

Salvan Sabah Matta Momika öldü:

Evinə soxulub güllələdilər.

Bir göz qırpında yayılan xəbər,
Neçə milyon üçün bayrama döndü.

 +

Kitab yandırmışdı Momika Salvan,

Kitabsa adi bir kitab deyildi.

Müqəddəs Quranın nüsxəsi idi,

Salvan Momikanın əlində yanan.

 +

Bu işi görmüşdü o dönə-dönə,
Quran yandırmışdı Momika yəni.

Sayı üç milyarddır Quranın yəqin,
Birini yandırdın – pul ver, al yenə.

 +

Dəyilməz, müqəddəs olan nədir bəs?

Milyon tirajlarla çap olunursa,
Üstündə konkret qiyməti varsa,
Sayıla bilərmi kitab müqəddəs?

 +

Yəqin düz eləmir kitab yandıran,

İstər Quran olsun, ya ayrı kitab.

Kim buna qətllə verirsə cavab,

Canavar qanıdır damarında qan.

 +

Quranmı səsləyib onu bu qətlə,
Deyib tapança al, deyib patron al?

Beləsə, Kitabın problemi var…

Əfsus, yozmaq olar bu işi belə…

 +

Assiriyalıydı Salvan Momika,
Yerli-köklü xalqdır İraqda onlar.

Quranlı ərəblər gəlib sonralar,
Yerli-köklü olan dönüb azlığa.

 +

Sıxılıb, əzilib azaldılıblar,
Dağılıb ən qədim xristian xalq,
Qovulub yurdundan qorxudularaq,

Kilsələr alışıb, yanıb adamlar.

 +

Dünyada milləti, özü didərgin,
Dərddən havalanıb kitab yandıran —
Qətlə yetirildi Momiko Salvan,

Günahı bizimdir tökülən qanın.

 +

İstər Quran, istər başqa kitablar —
Yaxşı oğlan deyil kitab yandıran.

Kitabı oxuyan axıdırsa qan,
Deməli, Kitabın problemi var…

 

31. 01. 2025, Samara

«SÖNÜB İSLAM İŞIĞI, ÇƏKİLİB YER ÜZÜNDƏN…»

Сен30

Bir neçə il Çernobıl atom stansiyası,
işləyib gecə-gündüz verdi enerji, işıq,

Təkcə işıq deyildi, vardı həm də istisi,
Zavodlara güc idi, küçələrə yaraşıq.

 +

Günlərin bir günündə baş verdi ağır qəza,

Adi qəza deyildi, fəlakətiydi əsrin,

Kül eləyirdi şüa kim gəlirdi haraya,
İndi də davam edir qəzanın fəsadları….

 +

Buna oxşar nəsə var mənim İslam dinimdə:

Yarandığı vaxt olub pozitiv enerjisi.

Sözə, elmə göz açan işığı olub həm də,

Kəşflər də çox olub fəthlərlə yanaşı.

 +

Haçan və hansı qəza baş veribdir bilmirəm,
Tükənbdir dinimin enerjisi, işığı.

Ondan zülmət şüası qalxaraq dağılır həm,

Məhdud hərəkətliyik: geri ya da aşağı.

 +

Harda İslam adıyla yaranırsa nə indi,
Aciz, əsir-yesirdir günüqaradır insan,

Allahdan irəlidə ölkədə Müstəbiddir,

Ölkə də ölkə deyil, cəhənnəmdir ya zindan.

 +

Məzhəb savaşlarında sayı yox qırılanın,
Məscidi yandırırlar, məktəbi partladırlar.

Kişi ayağı altda qalır, tapdanır qadın,
Sütül qızlar boğulur qoca yataqlarında…

 +

Azadlara uca yer yoxdur dar ağacından,
Təhlükə var susana, kəlmə də kəsməyənə.

Hər addımda, hər saat səslənirsə də əzan,
Allahı yox, Despotu xatırladır o sənə…

 +

Bilmirəm ki, nə qəza baş veribdir və haçan,
Sönüb İslam işığı, çəkilib yer üzündən.

Bəlkə şeytan azdırır, “İslam” deyilən zaman,

Çernobılı gözümün önündə görürəm mən….

 

30. 09. 2023. Samara