Sənə, əlahəzrət, salamlarım var,

Nökəruin Fazildir məktubu yazan.

Millət vəkiliyəm, yadında olar,
Həm də əsgərinəm, ali komandan!

 +

Gecəm-gündüzüm yox, böyük rəhbərim,
Canımı qoyuram sənin yolunda,

Nə qədər silsə də katibələrim,
Qurumur alnımda tərim bir an da.

 +

Əziz prezident! Böyüyüm, atam,
Var bundan, əlbəttə sənin xəbərin,
Ağır və şiddətli terror aktına,
Məruz qalıb həqir kölən, nökərin.

 +

Mənə hücum etdi xomeyniçilər,
Topdan, avtomatdan atəş açdılar
Sağalmır, düzəlmr qıçlarım hələ,
Beş-altı qəlpə də dal tərəfdə var.

 +

Səndən nə gizlədim, dalım dağılıb,

Yaramır, doğrusu, istifadəyə.

Neçə professor baxıb mat qalıb,
Nə vaxrdan həsrətəm yeyib-içməyə.

 +

Canı, əlahəzrət, sözümün budur:

Sənəd ustəyirəm əlilliyimə.

Mən kimi bir terror qurbanı yoxdur,
Göstərsəm ağlayır yaramı kimə.

 +

Pis olmaz  təzə bir maşın da versən,
Cızıb maşınımı İran gülləsi.

Ver lap yaxşısından, zirehlisindən,
Xomeyni gülləsi deşə bilməsin.

 +

Yaxşı pensiya ver, əlahəzrətim,
Yeyib yaxşılaşım, cana gəlim mən.
Yaman bahalanıb indi mal əti,
Doğrusu, bezmişəm ceyran ətindən…

Mirzə TƏBİL
23. 08.2023, Samara