İlk dəfə qurd ilə quzu məsəli,

Haçan deyilibdir? Kim tərəfindən?

Necə gəlib bunu deməyə dili? —
Bu məsəldə yalan heç nə yox hərçənd.

 +

Burda yalan yoxdur, riya var ancaq,
Mİndə bir quzudur qurda rast olan,

Məsəli çəkənsə əlində bıçaq,
Qurban quzu seçir sürüdən bu an.

 +

Uşağa yanımda “quzu” deyilsə,

Canımdan həmişə keçir gizilti,

Bıçaq, qiyməkeş ya ayrı bir kəsər,

Göz önümə gəlir, qanlı və iti.

 +

Quzu qucağında, ya da yanında,
Şəkil çəkdirməyə həvəslilər var.

Quzu əzizləyən incə qadında,
Axtarsan, yekə bir bıçaq tapılar.

 +

Başlar bədənlərdən ayrılır hər an,
Burda “Allah əkbər!”, ordasa sağlıq,

Dünən əzizlənən, öpülən heyvan,
Bu gün dolmalıqdır, ya da kabablıq.

 +

Var hər birimizdə qurd təbiəti,

Hərisik biz sütül quzu ətinə.

Əlimizdə bıçaq qanlı və iti.

Dinimiz də bağlı quzu qətlinə.

 +

Hər ağac dibində axıdılır qan,
Başa, dəriyə də yiyə duran var.

Quzu qanı tökür vermədən aman,

Quzunun qanıyla günah yuyanlar.

 +

Mində bir quzudur qurda tuş olan,

Həmişə, əlbəttə, quzuda şans var.

Əlinə bıçağı alıbsa insan,

Baş hökmən kəsilər, qan axıdılar…

29. 06. 2023, Samara