mühəndis usta soydaşım Rövşən Quliyevə

Qapımı düzəltdin, var ol, a yerli,

Rahat örtülür, həm rahat açılır!

Elə gedir açar irəli, geri

Elə bil ki, yağa bıçaq sancılır!

 +

Gözəl iş görmüsən, gözəl adamsan,
Təşəkkürlər, əziz mingəçevirli!

Əllərin qızıldır, qızıl adamsan,
Heyf, qızıl deyil şairin dili…

 +

Hey girib-çıxıram, kefim kökəlir,
Ustalığın kamil, işin möhtəşəm,

Kilid həmin kilid deyil elə bil,
Vallah, görmədiyim günə düşmüşəm…

+

 Soydaşım, əzizim, qapı dalında,

Qalmaqdan dünyada ağır nə vardır?

Öz qapın üzünə açılmayanda,
Gedən yerin yoxdur, günün qaradır.

 +

Qapı arxasında dayanıb hərdən,

Açarı ovcunda sıxıb qalırsan.
Qıfıl deşiyindən gələn hənirdən,
Duyursan o yanda durub yad insan…

 +

Soydaşa ürəyi yanan soydaşım,
Ömrün də işıqlı olsun adın tək.

Ustalığın kamil, nəcibdir işin,

Təmizdir, halaldır yediyin çörək.

04. 07. 2023, Samara