Pterozavrlar yaranıb əvvəl,
(Alimlər deyənə əgər inansaq) —

Düz iki yüz otuz milyon il qabaq!

Səksən milyon il keçib quşlara qədər…

 +

Quş olub uçuruq yuxuda bəzən

Belə yuxulardan şirini hanı?

Sevirik qanadlı yuxunu, varmı,

Yuxuda özünü sürünən görən?

 +

Həyatda…Həyatda həm qanadsızıq,
Vardır addımın həm məhdudiyyəti.

Qadağa pozmağa yox qətiyyəti,

İnsan itaətdə, sürünən, yazıq…

 +

Qapanıb ölkənin sərhədi çoxdan,

Açarı cibində uzurpatorun.

Kiriyib içində düşdüyü torun,

Çırpınıb çıxmağa can atmır insan.

 +

Yüz əlli milyon il keçib, deyirlər,

Quşların dünyaya gəldiyi vaxtdan.

Uçar millətim də bəlkə bir zaman —

On-on beş milyon il sürünüb əvvəl…

 

20.12. 2023, Samara