Архив тегов | şəhər haqqında şeir

«ÇƏTİN, ÇOX ÇƏTİNDİR PİYADAÇILIQ…»

İndiki zamanda şəhər yerində,
Çətin, çox çətindir piyadaçılıq.

Evin qapısından qırağa çıxcaq,
Həyatın, bilirsən, təhlükədədir.

Sanki sürücülər düşməni görür,
Səni həndəvərdə görən dəqiqə,
Eləsi az qalır çıxa səkiyə,
Eləsi maşını üstünə sürür.

Göz ağardanı var, qışqıranı var,
Biri işarəylə silah göstərir.

Bəlkə də kiminsə namaz üstədir,

Ya ayrı səbəbdən yan sovuşurlar.

Susmur nəriltisi mühərriklərin,

Əsirsən piyada zolağında da,
Sanki zebra deyil ayağın altda,
Keçirsən pələngin belində sanki.

Sükan arxasında qadınsa əgər,
Qalxır avtomobil şahə də hərdən.

Səni, məni minə beləsi birdən —
Necə ölü olaq, coşmarıq məgər…

Nə deyim, çətindir piyadaçılıq,
Elə bil azlıqsan – qovulan, həqir.
Nərələr dalımca evə də gəlir –

Vura bilməyiblər, yandırır acıq…

23. 08. 2025, Samara

Şəhərdə yekəpər, uca evlərin,
Balaca evləri gözü götürmür.

Onların yanaşı həyatı gərgin,
Həyat yox, daimi savaşdır ömür.

Uca, yekəpər ev dinc duran deyil,
Gözümçıxdıdadır yazıq balaca.

Gah açıq sataşır, gah da ki, qəfil,
Yorulub oturmur yekəpər, uca.

Yuxarı qatlardan ya kül əndərir,
Yanan siqareti tullayır hərdən.

Başına kranı açıb döndərir,
Özü də işəyir üstünə bəzən.

Gah yanır balaca, gah suda üzür,
Sarsılıb, üzülüb barı da, dam da.

Canını dişinə yığaraq dözür,
Bu zülmə ev nədir, dözməz adam da.

Balaca yekənin gözünə girir,
Korlayır peyzajı, perspektivi.

Görür yuxusunda zırpı hər gecə,
Silib yer üzündən balaca evi.

Balaca zavallı neyləyə bilər? —

Uca, yekəpərin göy dəlir başı!

Şikayət elərsən – gəlib sökərlər!

Hara getsən – onun dostu, qardaşı.

Sonu balacanın çatır deyəsən,

Zırpı təpiklərdən sarsılıb divar.

Var nə harayına onun tələsən,
Nə də yekəpərə “dayan” deyən var…

11. 04. 2024, Samara