Azərbaycanlılar nəinki Beıçika, hətta bütün qərb rəhbərlərinin başına ağıl qoyurlar – oxuduqca, eşitdikcə istəyirsən ya yerə girəsən, ya da başını vurasan divarın tininə…

Gündə prezidentin ayaqqabısından ən azı üç dəfə öpməyi ibadət kimi vacib bilən Eynula Fətullayev yazır ki, Avropa İlham Əliyevin sözünə qulaq assaydı, bu günə qalmazdı…

Belçikadakı partlayışlarda otuz adam ölüb. Azərbaycanda hər ay ən azı otuz adam özünü öldürür. Qocalar, cavanlar, məktəblilər özlərini asırlar, zəhərləyirlər, yandırırlar, suda boğurlar, yuxarı mərtəbələrdən atılırlar. Bir ay içində on bir yaşlı iki uşaq özünü öldürüb. Hansı Avropa ölkəsində belə şey var?

Az qala hər gün “qeyrətli” kişilər analarını, bacılarını, arvadlarını, qızlarını baltalayırlar, bıçaqlayırlar, güllələyirlər. Hansı Avropa ölkəsində belə şey var?

Azərbaycan əhalisinin çoxu keyfiyyətli su ilə təmin olunmur. Ölkənin çox hissəsində kanalizasiya yoxdur.

Və Azərbaycanda həyat varsa, niyə insanlar yaxşı bir yerə qaçmağa fürsət axtarırlar? Niyə saxta sənədlərlə, min cür fırıldaqla, alçalsalar da, Avropa ölkələrindən birinə özlərini soxmağa çalışırlar?

Hansı Avropa ölkədsinə şəhərlərə, vilayətlərə ofisiant rəhbər təyin edilir?

Hansı Avropa ölkəsində baytar sürücüsü general olur?

Hansı Avropanın səhiyyəsi Azərbaycan səhiyyəsinin günündədir?

Hansı Avropa ölkəsində qadın jurnalist hökuməti tənqidə görə dama salınır?

Hansı Avropa ölkəsində Milli məclis kimi parlament var? Yəni Hansı Avropa ölkəsində parlament yoxdur?

Hansı Avropa ölkəsinin polisi hamılıqla oğrudur?

Bir rus lətifəsi var: trolleybusda ayaq üstə gedən bir kefli tez-tez səndələyir və qarşısında oturmuş qadının üstünə yıxılır. Qadın onu məzəmmət edir: “Özünü düzəlt, əyyaş!” Kişi deyir: “Mən əyyaşam, sənin də qıçların əyridir”. Qadın təəccüblənir: “Mənim qıçlarımın bura nə dəxli?” “O dəxli var ki, mən sabah ayılacam, sənin qıçlarınsa sabah da əyri olacaq…”

Avropa özünü düzəldəcək, qalxacaq, Avropa bundan da ağır sınaqlardan çıxıb. Biz öz qeydimizə qalaq. Yaman gündəyik…