Adəm yaranandan indiyə qədər,
Yer üzü dəyişib, göy də dəyişib.
Erkəkli-dişili dəyişib bəşər,
Dəyişib İblisin həyatı, işi.
+
Uzaq gəzir daha xarabalardan,
Çoxdan ayaq basmır məzarlıqlara,
Min ilidr çıxarıb hamamı yaddan,
Bəlkə hərdən-birdən girər bazara.
+
Beşulduz oteldə yaşar adətən,
Bütöv mərtəbəni bronlayaraq.
Çalğı eşidilir mərtəbəsindən,
Bir insan da görmür özünü ancaq.
+
Hərdən çaldırsa da Rixard Vaqneri,
Amma Tartinidir əsl sevgisi.
Eşidən olub ki, ağlayıb deyir:
“Zalım necə dərin duyub İblisi!..”
+
Varıdır cibində nə pasport desən,
Şengen də, əlbəttə, öz yerindədir.
Bürüyür elə ki, canını qüssə,
Ürəyi haranı istəsə, gedir.
+
İxtiyarındadır gözəl yaxtalar,
Gəlir hər məzəsi, verməmiş əmr.
Ancaq nə dincələr, nə rahat yatar —
İblis depressantsız keçinə bilmir!
+
Tanrı hüzurundan qovulan andan,
Bir neçə milyon il sovuşdu artıq,
Bilinmir Qiyamət yetişər haçan,
Buna şübhəsi var İblisin açıq.
+
Sayı adamların – qarışqa sayı,
Törədir, çoxaldır, bəşər yorulmur.
Çıxır İblissiz də çoxunun zayı,
İnsanı şeytandan ayırmaq olmur.
+
Tüstüsüz alovdan yaradılandan,
Torpaqdan yaranan gedib irəli.
Döndərir, qaytarır İblis anbaan,
Atom düyməsinə uzanan əli…
11.10. 2023, Samara
xeyrulla xayal 