Misirdə nümayişçilər prezident Mursinin istefasını tələb edirlər….
…Bir kənddə iki tənbəl varmış. Şah tənbəli. Günlərin bir günü ağsaqqallar deyirlər ki, gəlin görək bunların hansı tənbəllikdə üstündür. Salırlar bunları bir dama, qıraqdan odlayırlar. Od yavaş-yavaş dama girəndə tənbəlin bir qışqırır: “Yandım!” O biri tənbəl pıçıldayır: “Mənim də yerimə qışqır!”
Deyilənlərə görə, Azərbaycan müxalifətçilıəri misirlilərdən xahiş ediblər ki, onların da yerinə “İstefa!” qışqırsınlar…
İlham Əliyev deyib ki, müxalifət Dağlıq Qarabağı ermənilərə bağışlamaq istəyir. Möhtərəm prezidentin sözlərinə, əlbəttə şübhə eləmək olmaz. Ancaq şeytan məni azdırdı, zat-alilərinin dediyini yoxlamaq üçün Ermənistan prezidenti Sarqsyana zəng vurdum. Dedim kirvə, Dağlıq Qarabağı bağışlayırıq sizə. Sarqsayn qəhqəhə çəkib geldü və dedi: “Kirvə, bizdə olan şeyi sən bizə necə bağışlaya bilərsən? Sən bizə Qəbələni bağışla, Zaqatalanı bağışla, Qubanı bağışla…”
Telefonu söndürdüm. Necə deyəydim ki, o yerlər çoxdan bağışlanıb Heydərovlara, Paşayevlərə, Əliyevlərə, Məmmədovlara…
Azərbaycan demokratik inkişaf yolunda arşın addımlarla irəliləyir. Bakıda həbs olunan müxalifətçi gənclərin indi ancaq saçları qırxılır. Tükdür də, bu gün qırxırsan, sabah əvvəlkindən də yaxşı gəlir. Ölkələr var ki, orda müxalifətçilərin başını qırxmılar, başın özünü kəsib atırlar. Fərqi görürsünüz?
İndi özünüz deyin: bir ovuc tükdən ötrü hay-küy salmağa dəyərmi?
Yeri gəlmişkən, deyilənlərə görə, Ramil Usubov əvvəllər dəllək olub. Baş da qırxırmış, sünnət də eləyirmiş.
Yəni ki, özünüzü gözləyin. Nazir geniş profilli sənətkardır!
Mirzə Əlil
Azərbaycn daxili işlər nazirliyinin sifarişi ilə İrandan Bakıya bir ton yüksək keyfiyyətli narkotik maddə gətirilib. Bu zəhrmarın yaxln vaxtlarda müxalifətçi gənclərin cibindən çıxacağı gözlənilir.
İsa Qəmbərin oğlunun toyundan çəkilən şəkillərə baxırsan, fikir götürür…
Zalda arvadlı-kişili bəlkə min adam var. Bunlar hamısı, şübhəsiz ki, İsa Qəmbərin yaxın adamlarıdır, onunla həmfikir olanlardır. Və bu min nəfərdən də hər birinin toyda iştirak etməyən beş-on yaxını, həmfikiri var. Toplasan, böyük bir rəqəm alınar. Müxalifət rəhbərinin, prezidentıiyə namizədin belə sıx ətrafının olmağı, əlbəttə, yaxşıdır. Ancaq Azərbaycan spesifik ölkədir. Ölkədə nəinki hakimiyyətin dəyişməyi, hətta hakimiyyyətin özünü necə aparmağı seçkilərdən çox insanların vətəndaşlıq fəallığındn asılıdır. Müxtəlif formalı dinc küçə aksiyaları hələlik Azərbaycan üçün, təəssüf ki, daha vacibdir. Bunu müxalifət liderləri də yəqin başa düşərlər. Elədirsə, niyə həmin aksiyalarda cəmi 100-150 adamlar iştirak edirlər? Niyə bu toya yığışmış xanımlar və bəylər o aksiyalara qatılmırlar? Bu özgə əliylə ilan tutdurmaq deyilmi?
Toy öz kütləviliyi ilə, dəbdədəliyi ilə həyatımızdan çıxmaq istəməyən, əksinə daha da vüsətlənən arxaiklik nümunəsidir. Və müxalifət məişətdə müasir ola bilmirsə, ölkə idarəsində, siyasətdə müasir ola bilərmi?
Və ümumiyyətlə, Azərbaycanın ən yaxşı gənclərinin türmədə yatdıqları bir vaxt belə dəbdəbəli mərasimin keçirilməsi düzdürmü?
Azərbaycanın müxalifətçi gənclərindən iki xəbər. Biri bəd, biri xoş. Xoşdan başlayaq. Təzə tutulanların cibindən narkotik çıxmır – yəqin tərgidiblər. Bəd xəbər – təzə tutulanların cibindən top-tüfəng çıxır, yəqin prezident sarayına hücuma hazırlaşırlar.
10 mart 2013. Kosmos
Amerika peyki Azərbaycan peykinə deyir ki, deyəsən adamlara güllə atırlar. Azərbaycan peyki deyir ki, yox, güllə deyil, qoz-fındıqdır, noğul-nobatdır…
iki polisin söhbəti
— Sən yaşından neçə dəfə çimmisən?
— Körpəlikdə, qırx günümdə çimənəm. Bəs sən?
— Bir dəfə arxa düşmüşəm kənddə. İndi də mitinqi dağıdanda islandım.
— Ba, sən suquşusan ki!
Azərbaycanın daxili işlər naziri deyib ki, müxalifət mitinqləri bundan sonra da polis qüvvəsiylə dağıdılacaq. Ramil Usubov deyib: “Ancaq bundan sonra ola bilsin ki, biz sudan benzinə keçdik, çünki qabaqdan yay gəlir, Bakıda su qıt olacaq. Allaha şükür ki, neftimiz bundan belə əlli il də mitinq dağıtmağa çatar”.
Gözəl Bayramlı adlı siyasətçinin Fb-da səhifəsinə baxdım, bilmirdim ki, kişidir ya qadın. Qadınmış. ATƏT seminarına basqından yazır. Oxuyub xeyli gülmüşəm. Belə gülməym yadıma gəlmirdi. Gözəl xanım yazır: “Növbəti basqın ATƏT-ofisinə olsa, heç şaşırmaram. Kürü, para üzərində qurulan siyasətin belə sonucları təbiidir və bunlara qatlanmaq zorundadılar…”
Təsəvvür edəndə ki, polis ATƏT ofisinə hücum edir və Gözəl xanım da mərd-mərdanə dururb “şaşırmır”, adam az qalır gülməkdən ölsün, hərçənd mən bilmirəm ki, şaşırmamaq nə deməkdir. Şaşırmağın da nə demək olduğunu bilmirəm. Ancaq çox gülməlidir…
“Kürü, para üzərinədə…” Əvvəlcə elə bildim ki, para – yarı mənasındadır, yəni ki, kürü verirlər, sonra da ağbalığın yarısını. Sonra başa düşdüm ki, para “pul” mənasındadır, yəqin indi Azərbaycanda qadın xeylağı üçün “pul” demək ayıb sayılır, gərək “para” deyə”. Gülməkdən boğulmuşdum…
Sonunda adamın lap qarnı cırılır. “…və bunları qatlanmaq zorundadır”. Bunu başa düşmədim, ancaq “zorundadır” sözü məni elə güldürdü ki, az qaldım huşumu itirəm. Allah sizi güldürsün, ay Gözəl xanım! Adınız gözıəl, sözünüz gülməli. Yəqin müxalifət hakimiyyət başına gələndə sizi gülmək naziri qoyacaqlar. Xalq o qədər güləcək ki, özündən gedəcək…
Belə-belə işlər… Çox gülmək də yaxşı deyil. İndi görürəm ürəyim sıxılan kimidir. Bəlkə şaşırmışam, bəlkə şaşırmamışam. Quqldan bu şaşırnağın nə olduğunu öyrənmək istədim, Quql məəttəl qaldı…
Oyununuz olsun, ay Gözəl xanım!
xeyrulla xayal 