When my love swears that she is made of truth…

Sevgilim and içir su kimi safdır,

Mən də inanıram, desə də yalan.

Bəlkə də o məni nadan gənc sayır,
Guya xəbərim yox hoqqalarından.

Düşünmək xoşdur ki, məni gənc sayır,

Fərəhli günlərim bitsə də dalda.

Sadəcə dilinə etibarım var,
Mən də gizlədirəm doğrunu, o da.

Niyə bəs demir ki, məni aldadır?

Niyə gizlədirəm yaşımı mən bəs? –

Zahiri etibar eşqə qaydadır,

Yaşlı eşqə düşsə, yaşını deməz.

             Nə qədər aldadaq  bir-birimizi,
             Hər ikimiz belə yalanla razı.

İngiliscədən tərcümə

03.05. 2018

Samara

                                    Thou blind fool love, what dost thou to mine eyes…

Kor sevgi, neylədin gözlərimə ki,

Görmür görünəni, baxsa da onlar.

Bilərək hardadır, nədir gözəllik,
Yaxşının yerinə pisə vurular.

Bütün kişilərin yelkən açdığı

Körfəzə gözlərim lövbər atırsa,

Gəzəri gözlərdən yonub qarmağı,
Qəlbimi bağladın niyə axı sən?

Abırlı guşə tək mənə görünən,
Yer karvansaraymış, anlayır ürək.
Bunu görən gözüm yox deyir niyə,

Bu çirkin yalanı suya çəkərək?
                 

               Ürəyim, gözlərim doğru olanı,
              Tanımır, əsiri olub yalanın.

İngiliscədən tərcümə

02-03.05.2018

Samara

QEYD: Bu sonetdə şair yenə sevgilisinin sədaqətsizliyindən gileylənir, onu “bütün kişilərin yelkən açdığı körfəzə”, “karvansaraya” (orijinalda: the “wide world’s common place”) bənzədir.

If thy soul check thee that I come so near,

Qəlbin əgər məni qaçaq qovarsa
De kor qəlbinə ki, İstəyinəm mən.

Və qəlbin İstəyə bilir, razısan;

Sevgi diləyimi  ödə indi sən.

Sevgi xəzinəni doldurar İstək,
Orda istəklər çox, mənim biri də
Bir şeydən elə ki çox olur, demək,
Onların içində biri heç nədir.

Məni bu sırada hesaba alma,
Sənin siyahında qalaram hərçənd.

Sən məni heç nə say, istərəm amma,

Əziz bir şey olsun sənə bu heçnə.

                  Təkcə adımı sev, adımsa  — İstək,
                  Məni sevəcəksən, adımı sevcək.

İngiliscədən tərcümə

01-02.05. 2018
Samara
QEYD: 135-ci sonetin davamıdır; şair yenə “Will” (Burda – istək, kişi adı və s.) sözü ətrafında sö oyunu yaradır.

                      Whoever hath her wish, thou hast thy Will…

Hər kəsdə arzu var, səndəsə İstək,
İkinci, üçüncü İstək üstəlik.

Yox həris istəyən səni mənim tək,
Bununla artıran səndə istəyi.

+

Böyük, tutumludur istəyin sənin,
Bəlkə məndəkini alıb gizlədə?

Özgə istəyini sən bəyənirsən,
Bəs niyə mənimki səni bezdirir?

+
Nə qədər su ola dənizdə, yenə,
Artırır yağışla ehtiyatını.
Sən də qat İstəyi öz İstəyinə,
Mənim istəyimlə İstəyin artar.

+

       İncidib soyutma istəyənləri,

    Olsun bu İstəkdə mənim də yerim.

İngiliscədən tərcümə

30.04-01.05.2018, Samara

QEYD: Başqa dillərə tamdəyərli tərcüməsi mümkün olmayan sonetlərdəndir. Söz oyunu üstündə qurulub. “Will” sözü 13 dəfə işlədilib, həm xüsusi ad kimi (şairin öz adı, həm də, gümana görə, dostunun-rəqibinin adı), həm də istək mənasında. İngilis şərhçiləri Şekspir dövründə bu sözün konkret anatomik məna daşıdığını da bildirirlər.

                                Beshrew that heart that makes my heart to groan…

Yansın o ürək ki, vurduğu dərin,

Yara dostumu, həm məni ağrıdır.

Tək mənim əzabım bəs deyil yəqin,
Dost başı da girib boyunduruğa.

Məni məndən alıb amansız gözün,

Saldın köləliyə dostumu indi.

Məni sən də atdıın, o da, həm özüm,

Üçqat işgəncədir mənim çəkdiyim.

 
Qapa ürəyimi polad sinəndə,
Ver mənə əvəz tək dost ürəyini.

Zindanın çox ağır olmaz sənin də,

Çəksəm dost qəlbinin mən keşiyini.

                       Sənə dustağamsa, səninəm hərçənd,
                       Mənimlə inciyər nə varsa məndə.

İngiliscədən tərcümə

28-29.04.2018

Samara

QEYD: Sonet şairin “əsmər” xanımla mürəkkəbləşmiş münasibətlərini əks etdirir; xanımın cazibəsi şairin gənc dostunu da əsir edib və beləliklə, şair həm sevgilisini, həm dostunu itirdiyindən şikayətlənir.

Thine eyes I love, and they, as pitying me…

Sevimli gözlərin acıyır mənə,
Görüb soyuqluğun necə incidir.

Qaralıqlarıyla yaslıya bənzər,

Baxaraq halıma yanır elə bil.

Səhər günəşi də, doğrudan, belə,
Bəzəyə bilməzdi səmanı şərqdə.

Ulduzlar da çətin yarada bilə,
Alatoran qərbdə yarısı qədər,

Sənin gözlərindən doğan cəlalın.

Matəm yaraşırsa, qoy geyib qara,
Onda ürəyin də yansın halıma,
Bütün rəhmini də qaraya bağla.

          Gözəllik qaradır, and içərəm, bil,
          Eybəcər o kəs ki, bu rəngdə deyil.
       

İngiliscədən tərcümə

27-28.2018

Samara

Thou art as tyrannous, so as thou art…

Necə ki, qəddardır gözəliyindən,

Qürurlanan gözəl,  sən də tiransan.

Çünki ürəyimdə, bilirsən ki, sən,
Gözəl bir incisən, tayı olmayan.

Çöhrəni hər görən arxayın deyir,

Hökmün yox aşiqi inlədə bilən.

Qorxuram deməyə “yox, elə deyil”,

Ancaq and içirəm içimdə hərçənd.

Andıma sübut tək min dəfə nalə,

Çəkərəm çöhrəni yada salaraq.

Səs-səsə verərək təsdiq edərlər,

Əsmər bənizindir könlümə çıraq.

                    Əməllərindədir qaralıq sənin,

                   Bundan da söz-söhbət yaranır yəqin.

İngiliscədən tərcümə

26-27.04.2018

Samara

   130-CU SONET    (heca ilə)

                             My mistress’ eyes are nothing like the sun…      

Günəşə gözləri onun bənzəmir,
Mərcan tək al deyil dodaqları da,
Sinəsi ağ deyil heç də qar kimi,

Qara məftil bitir onun başında.

+

Dəməşq qızılgülü ağ var, al da var,
Onlara bənzəmir yanaqlarısa.

Ətir var qoxusu daha xoş olar,
Onun nəfəsindən, yanında dursan.

+

Nitqini sevirəm, bilirəm hərçənd,

Qəlbə daha xoşdur musiqi səsi.

İlahə yerişi görməmişəm mən,
Addımı ağırdır sevgiliminsə.

+

            Ancaq üstün deyil ondan heç biri,    

            Yalan təşbehlərlə bəzənmişlərin.

İngiliscədən tərcümə

26.04.2018

Samara

130-CU SONET (əruzla)

              My mistress’ eyes are nothing like the sun;
Coral is far more red than her lips’ red…

Bənzəri gözlərinin yox günəşə,

Daha aldır dodağından mərcan.
Qar kimi ağ deyil əsmər sinəsi,

Saçı məftil kimi qara, burulan.

+

Dəməşq qızılgülü var qırmzı, ağ,

Bənzəməz onlara yanaqları da.

Daha gözəl və xoş ətirlər var,

Nəfəsindən onun gələn qoxudan.

+

Necə sevsəm də yarın nitqini mən,

Daha xoşdur, bilirəm, nəğmə səsi.

Necə gəzir ilahə, görməmişəm,

Mənim yarımsa torpaq üstdə gəzir.

  +

         Bilirəm mən, yenə çatmaz amma,

         Saxta tərifli gözəllər yarıma.

İngiliscədən tərcümə

29.09.16

Samara

    Th’ expense of spirit in a waste of shame… 

Şəhvət – ruhun ayıb biyabanıında,

Boş yerə xərcidir — baş tutan zaman.
Əvvəlsə — yalandır, qətl və qandır,
Onunla vəhşiyə çevrilir insan.

Tez ikrah yaranır kef sona yetcək.
Dəli tək qaçırlar dalınca, amma,
Dəli tək nifrət də edirlər, necə,

Tələ yemi udan gedər ağıldan.

İstəyən də dəli, çatan da dəli,

Olmuş,  arzulanan, olan da bəla.

İstəyən xoşbəxtdir, alansa qəmli,
Olmamış – sevincdir, oldusa – xülya.

            Bizi cəhənnəmə aparan cənnət
            Kefindən yayına bilmirik fəqət.

İngiliscədən tərcümə

24-25.04.2018

Samara