Архив тегов | İsmayıllı

SALYANLILARIN İSMAYILLI ZİYARƏTİ

 

Xəbər verirlər ki, bu gün səhər tezdən Salyandan yeddi ya səkkiz avtobus çıxıb, İsmayıllıya yola düşüb. Hər avtobusun içində olarmış qırx-əlli adam, bunların da içində həkimılər, müəllimlər, gözəllik salonlarında işləyənlər, xırda sahibkarlar. Bu avtobusları Salyan mollaları və polisləri böyük hörmətlə yola salıblar.

Bir neçə müxalifət qəzeti tələsik xəbər yayıb ki, guya salyanlılar İsmayıllıda aksiya keçirənlərə və tutulanlara həmrəylik bildirmək üçün ora gedirlər. Ancaq Salyan başçısı açıqlama verib deyib ki, salyanlılar İsmayıllıya Mirdamad ağa Seyidovun ziyarətinə gedirlər.

Məlum məsələdir ki, yer üzündə salyanlılar kimi dindar millət yoxdur, çoxunun alınlarına baxanda möhür yeri görünür. Harda ocaq varsa, salyanlılar ordadır. Müəllimlər dərs ilinin yarısını ocaqlarda keçirirlər. Hərçənd baxıçı,  falabaxan, çöpçü yanına gedənlər də çoxdur. Deyilələrə görə bu yaxınlarda Salyanla Beyləqan arasında təyyarə reysi açılacaq, çünki avtobuslar zəncir ocağına gedənlərin öhdəsindən gələ bilmir.

Hə, salyanlılar günorta vaxtı gəlib çıxıblar İsmayıllıya. Yığışıblar icra binasının qabağına, düşüblər üzqoylu: “Ya Mirdamad ağa!” Mirdamad ağa da çıxıb salyanlılara deyib: “Allah ziyarətinizi qəbul eləsin!”

Salyanlılar icranın qabağına çoxlu nəzir qoyublar. Bir neçə gənc deyirmiş ki, biz elə tələbə olandan Mirdamaq ağaya nəzir veririrk, rektorumuz olub, cəddinin köməyilə diplom almışıq…

Deyilələrə görə, salyanlılar indi sağ-salamat qayıdıb gəliblər evlərinə. Sabah Salyandan yenə yeddi-səkkiz avtobus çıxacaq…

 

Mirzə  ƏLİL

 

BU, BİOQRAFİYA DEYİL, BİR SƏHİFƏLİK SÖYÜŞDÜR

İsmayıllıya icra başçısı təyin olunan Mirdamad Seyidovun əvvəllər işlədiyi yerlərin siyahısı ismayıllıların ünvanına bir səhifəlik söyüş kimi oxunur:

Xalq təsərrüfatı institutu – yəqin dünyanın ən rüşvətli məktəbidir.

Maliyyə-kredit texnikumu – bu da ana söyüşü kimi bir şeydir.

Vergi idarəsi – bu, faizli və çoxmərtəbəli söyüşdür.

İqtisad universiteti: Burda işləyən və işləmiş adamlar gərək Nürnberq kimi məhkəmə qabağında dayanalar – on minlərlə gənci mənəviyyatını pozduqlarına görə.

Aqrar universiteti – bu məkəbi qiymətləndirmək üçün Azərbaycandakı zootexniklərə, baytarlara, aqronomlara baxmaq kifayətdir…

İsmayıllılara bu söyüş bəsdir, daha Mirdamad ağanın qohumlarının gəlib onları söyməyinə ehtiyac yoxdur…

AZƏRBAYCANDA «BEŞ QƏPİK -2» AKSİYASI

Azərbaycanda “Beş qəpik – 2” aksiyası start götürüb. Aksiyada məqsəd kifayət qədər vəsait yığıb beş İsmayıllı icra hakimiyyətinin başçısı Nizami Ələkbərovun halal zəhmətlə aldığı və kütlə tərəfindən yandırılmış beş bahalı avtomobilinin, üç skuterinin və başqa əmlakının əvəzini ödəməkdir.

BUNKER MƏSLƏHƏTLƏŞMƏLƏRİ

—         Allo! Allo! Bəşər Əsəddir?

—         Bəşərdir!

—         — Bəşər, mən İlham Əliyevəm. Bizdə qarəşıqlıqdır, istəyirəm sənnən məsləhətləşəm.

—         İlham, bərkdən danış, səs yaxşı gəlmir, çünki mən bunkerdəyəm.

—         Bəşər, mən elə sənnən bunker barədə məsləhətləşmək istəyirəm…

İSMAYILLILAR DA ÖYRƏŞƏCƏKLƏR?

Deyəsən, qubalılar da söyüləndə qalxmışdılar…

Qəribədir, insanların dədə-baba torpaqları əllərindən alınır, əsrlərdən keçib-gəlmiş və müqəddəsləşmiş yer adları dəyiışilir, meydanlarına Amsterdam küçələrində dayanan fahişələri xatırladan ağaclar əkilir və bu ağacların arasında onların ata-babalarını qırx il minib-çapmış adamın heykəli qoyulur – təhqir saymırlar. Bir qudurğanın söyüşünü təhqir sayırlar. Bu, dərin təəssüf doğurur. Çünki sabah bu hampazorluğun məsuliyyətini daşıyan ölkə başçısı ismayıllıların gözü qabağında o söyüşçül gəncə bir qapaz vursa, hamısının ürəyi yumşalacaq, gedib şəhərlərinin qalan küçələrində də o fahişəyə oxşayan ağaclar əkəcəklər və bu ağaclar arasında onları qırx il minib-çapmış adamın yeni heykəllərini qoyacaqlar…

Söyüşlə qalxan xalq – bu, məyusluq doğurur…

Fikirləşirəm ki, birdən salyanlıları söyələr… Yadıma düşür ki, sovet vaxtından dönə-dönə söyüblər – qalxmayıblar. Şəhərlərini alt-üst eləyiblər – qalxmayıblar.

Öyrəşiblər?

ƏSƏDİN DƏSTƏYİ

İsmayıllı rayonunda baş vermiş qiyamla əlaqədar olaraq Suriya prezidenti rayon icra başçısına zəng edib onu dəstəklədiyini bildirmişdir.

DEYİN, HARDADIR…

İsmayıllı başçısı deyib ki, “qeyri-sağlam qüvvələr” etirazçıları onun evinə yönəldiblər.

Kişi düz deyir. Sağlam qüvvələr lazımdır ki, avam  insanlara  Azərbaycan dövlət idarəsinin yerləşdiyi evi  göstərsin…