Allah saxlasın!
Allah işini avand eləsin!
Allah pul yetirsin!
Allah toy qismət eləsin!
Allah başına daş salsın!
Allah anasını ağlar qoysin!
Allah yaxşı müştəri salsın!
Allah baisin evini yıxsın!
Allah istəməyəni kor qoysin! Və bu qəbildən saysız cəfəngiyyat…
Ay millət, özünə qoyul! Allah nə edəcəyini səndən yaxşı bilir!
01.12.2013
Ah, Vətən! Bu gün Azərbaycanda bayramdır… Dirçəliş günü…
Ah, Vətən!
Muğamat, Aşura, şor…
Sünnət toyu, İmam ehsanı, Az TV…
Bu Dirçəliş günündə Vətənin necə dirçəldiyini görüb sevinməyən insan olmaz, olsa da ol şəxsdə vicdan olmaz!
Azərbaycan məşədilərin sayına görə dünyada birinci, kərbalayıların sayına görə ikinci, hacıların sayına görə üçünncü yerə çıxıb!
Azərbaycan dünyaya verdiyi töhfələrlə millətin başını ucaldıb: Azərbaycan Ermənistana Qarabağ və üstündə də yeddi rayion, Gürcünstana neft, qaz və Heydər babanını heykəlini, Rusiyaya iki milyon qastarbayter, Avropa diplomatiyasına tonlarla qara kürü verib!
Ah. Vətən!
Palçıq, yağış, qarğış, anaşa, bıçaqlaşma…
Bəy tərifi, qeybət, rüşvət, molla kəbini…
Əliyevlər Paşayevlər, Heydərovlar, Mehriban xanım, Mehriban xanıma ərizə…
Borc, kredit, faiz, infarkt, insult, türmə…
Qaçqınlar, köçkünlər, kefxanalar, hamamxanalar, yavaxanalar, Bayraq meydanı…
Heç bir ölkədə Allahın adı Azərbaycanda olduğu qədər çəkilmir. Bir gündə azərbaycanlıların neçə dəfə “Allah” dediyini saya bilən kompüteri hələ yahudilər və xaçpərəstlər yarada bilməyiblər, çünki qeyrətləri yoxdur…
İndi bu yazını oxuyan hər millət övladı deyəcək: “Mirzə Əlil, Allah sənin…”
Ah, Vətən!
Muğamat, bulvar, baobab, Aygün Kazımova…
Aşura, şor, dərd, göz yaşları…
Bayramınız mübarək…
Mirzə Əlil
17.11. 2013 Samara
Əliyev: Ramil, eşitmişəm marafon olacaq, nə marafondur bu?
Usubov: Zat-aliləri, marafonu “Azadlıq” qəzeti keçirir.
Əliyev: Ramil, deyirəm bəlkə açaq sərhədi, bizdə ərazi bu marafona bəlkə çatmaya, qoy qaçıb getsinlər ya Rusiya tərəfə, ya da İrana-zada…
Usubov: Zat-aliləri, bunlar qaçış marafonu keçirmirlər, bunların firkri nəzir yığmaqdır… qəzet pulları qurtarıb…
Əliyev: Ramil, onda sərhədi hökmən açmaq lazımdır. Burda kimdir onlara nəzir verən? Qoy getsinlər Rusiyaya, Türkiyəyə, İrana, nəzirlərini yığsınlar. Həm de deməsinlər ki, biz demokratiyanı boğuruq…
Təzə müdafiə naziri Zakir Həsənov deyib ki, «Azərbaycan ərazilərini işğaldan azad etmək hüququnu özündə saxlayır». Bunu eşidənlər Zakir Həsənovun ölənlərinə min rəhmət deyiblər, çünki millət elə bilirdi ki, bu hüquq çoxdan it-bata düşüb, ya da antimilli insanlar satıb-yeyiblər. Şükür allaha ki, hüquq yerindədir, hüququmuz olan yerdə də bizə zaval yoxdur, ermənilər lap Azərbaycanın qalan yarısını alsalar da…
Azərbaycan kişilərinin motal papaq, başlıq, çalma, rus kepkası qoyan vaxtları olub. Amma Əliyevlər gələndən kişilərin çoxu başında qapaz gəzdirir və başı qapazlıların sayı get-gedə azalmır, artır…
Hacı Allahşükür Paşazadə Məkkədə səs verib. Deyilənlərə görə, səs verərkən Allahşükür Şeytan ər rəcimlə əlbəyaxa olub, Allahın lənətinə gəlmiş Hacıdan tələb edirmiş ki, Hafiz Hacıyevə səs versin, Hacı nə qədər çalışıb Şeytanı başa salsın ki, Hafiz elə İlhamın adamıdır, Şeytan özünə qoyulmayıb. Allahşükür özünü itirməyib, Məkkəyə gedəndə Qaradağ karxanasından xeyli daş götürüb əbasının cibini doldurubmuş, çıxarıb bu daşları çırpıb Şeytana, lənətə gəlmiş qıçlarınını arasını tuta-tuta qaçıb, Hacı da rahatca səsini verib İlham Əliyevə…
Mən bir felyetonun adını qoymuşdum “Azərbaycan toyuqların vətənidir”, Samaranın qeyrətli azərbaycanlıları məndən incimişdilər, hətta məni öldürmək istəyən də olmuşdu, onların fikrincə, mən qəhrəman millətimizə “toyuq” demişdim. Hərçənd mən igid millətə toyuq deməmişdim, demişdim ki, ilk toyuq Azərbaycanda olub, deməli, ilk yumurta da Azərbaycanda olub, bununla sübut edirdim ki, Azərbaycan toyuğun, yumurtanın və … tortun vətənidir, yəni İlham Əliyevin şərəfinə Qarabağ ərazisi boyda tortun bişirilməyi təsadüfi deyil…
Seçkilərdən sonra bu məsələ məndə bir az şübhə yaradıb. Deyirəm bəlkə elə bizim millət doğrudan da toyuq millətdir? Belə deyilsə, niyə seçki kampaniyası 21 gün çəkir?
Mirzə Əlil
14.10.2013 Samara
