I.S. BAX. TOKKATA VƏ FUQA RE MİNOR BWV 565

Авг5

20230721_135628

Yarım əsr qabaq, ya əvvəl daha,

Hərdənbir tokkata səslənən zaman,

Veriliş içində, konsertdə ya da,

Canlanan olurdu soydaşlarımdan.

 +

“Bayatı-Şirazdır sanki çalınan,

Gör bizim muğama bənzəyir necə!
Bizdən götürübdür bəlkə bu alman,
Lap bizim muğam tək şirin və incə!..”

 +

Qızırdı qanları “sübutlananda”,
Bu ölməz əsərin “bizimkiliyi”,

Radio, tokkata çıxırdı yaddan,
Fuqaya çatmırdı səbri heç kimin.

 +

Soydaşım nə vaxtdan kitablar yazır,

Dissertasiyalar yazır, yorulmur…

Yazır İnterpola  Baxdan ərizə,
Deyir tapın harda gizlənir oğru…

 +

Bənzər ilk baxışdan çiçək çiçəyə,
Ulduzu ulduzdan ayırmaq çətin.

Bənzərdir musiqi kəlməsi deyə,
Başına “bizimdir” fikri gəlməsin…

 +

Heç muğam özü də bizim deyildir,

Şiraz yaranmayıb əllərimizlə,

Babalar bayatı, bəli, deyibdir,
Yoxdur heç kimin də davası bizlə…

 +

O ki qaldı Baxa…Tokkatasında,
Dərin duyğu da var, təfəkkür də var.

Bizimki elə bil əbədi yasdır,

Bizimki — sızıltı, nalə, yar, əğyar…

 

05. 08. 2023, Samara

ZABİL PƏRVİZİN SEVİMLİ ŞAİRİ SEYİD ƏZİMƏ 2-Cİ NƏZİRƏ

Авг3

20230721_135628

 Olmasaydı gözəllik aldığım bu xanımda,

Saxlamazdım onu mən bircə gün də yanımda.

 +

Zəng vurar ya esemeslə çağırardım atasın,
Qoşulub bəlkə gələrdi iki-üç qaynım da.

 +

Çay-çörəklə keçirərdim geniş müşavirə mən,
Söyləyərdim nə yığılmışsa xəstə canımda.

 +

Uyub əğyara, deyərdim ki, nə vaxtdan qızınız,
Xolesterin də, şəkər də çoxalıb qanımda.

 +

Məni saymır görürəm ki, qudurub əğyar da,
Tutmuşam üç dəfə  öz külbeyi-ehzanımda.

 +

De, əziz qaynata, mən bəlkə cinayət törədim,
Görüb əğyar uzanıbdır mənim divanımda?

 +

Seyyid əğyarı görüb korluğa qoymuşdu özün,[i]

Bunamı mən əl atım? Başqa yox imkanım da…

 

 03. 08. 2023, Samara

 

[i] “Ey kaş,olaydı bu tamaşadə gözüm kur…(S.Ə. Şirvani)

SURƏT HÜSEYNOVUN ÖLÜMÜNƏ YAZILMIŞ MƏRSİYƏ

Авг1
Surət Hüseynov

Ağlayır, qan-yaş tökür,

Qoyun yunu yuyanlar.

Mələşir, boyun bükür,
Sürülərdə qoyunlar

 +

Çox idi pulu, malı,
O, sərvətdə tək idi,

O, qoyun generalı,
O, yun polkovnikiydi.

 +

Sevirdi Yevlax onu,
Sevirdi onu Gəncə.

Sevirdi inək, qoyun,
Sevirdi toyuq-cücə.

 +

Ona aşiq idi xalq,

O da xalqı sevirdi.

Üsyan elədi qoçaq,
Elçibəyi devirdi.

 +

Qabağına qataraq,
Qoşunu dəhmərlədi.

İki güllə ataraq,
Aldı Surət Ələti.

 +

Qaçırdı qabağından,
Qarnizonlar, alaylar.

Belə möhtəşəm insan,

Deyin mənə, harda var?!

 +

Böyürdü Milli məclis,
Qoyun kimi mələdi.

Fürsət tapıb Əbülfəz,

Bakını tərk elədi.

 +

Nə silaha əl atdı,
Nə xalqa ağız açdı,

Tez  daban əlli altı,
“Dədəm vay!” dedi qaçdı.

 +

Qoyun polkovnikindən,

Millətə gəldi fərman:

 “Heydər gəlir yenidən,

Odur indi baş çoban!

 +

Yenə mal-qarasınız,
Qoyunsunuz yenə də.

Otarar, minər sizi

Yenə Əliyev öndər.

 +

Qarnınızda diliniz,
Səcdəyə olun hazır.

Qayıdır zalımınız,

Mən də ona baş vəzir”.

 +

Yun, qoyun generalı,
Üsyan etdi beləcə.

Müsibət oldu dalı,
Ağlaşma və faciə.

 +

Bir azca səbr elədi,

Dözdü Əliyev Heydər.

Surəti zəncirlədi

Atdı zindana öndər…

 + 

Kim ona qıydı indi,

İgid Surətim öldü?!

Kim onu zəhərlədi,
Axdı içinə ödü…

 +

Əllərin quruyaydı,
Qəhrəmanıma qıyan!

O, yun generalıydı,
Yox daha o cür insan!

 +

Mələyir qoyun kimi,

Mirzə Təbil də indi.
Öldü yun polkovniki, ,-
Necə çəksin bu dərdi…

 

Mirzə TƏBİL

01. 08. 2023, Samara

 

BETHOVEN. AYİŞIĞI SONATASI

Июл28

20230721_135628

Aya enməmişdən Nil Armstronq,

Yüz yetmiş il əvvəl – var bu gümanm,

Enib, pəncərəsi önünə qonub,
Ay özü bir axşam dahi almanın.

 +

Lüdviq van Bethoven möcüzəsnin,

Bəlkə orbitinə yetişib səsi,

Yenilib musiqi cazibəsinə,

Möcüzə yerinə enib tələsik.

 +

Dörd milyard yarım il yaşında hələ,
Bethoven yaradan səs kimi bir səs,
Yarıb gəlməmişdi göyləri belə,

Bu səs yarı ruhdu, yarı da nəfəs.

 +

Otuz yaşlı alman şamı söndürüb,

İşıqlanan zaman birdən həndəvər.

Ayı pəncərənin önündə görüb,
Görüb görünməyən tərəfini də.

 +

Və dahi dinməzcə danışıb ayla,

Dəyişib otağı ay yaraşığı

Saxlayıb Bethoven not yazısıyla,
Onun şərəfinə axan işığı.

28. 07. 2023, Samara

«QURBANLIQ QOÇ GÖNDƏR, TANRI, QATİLƏ…»

Июл27

20230721_135628

Bəlkə də hər günün hər saatında,

Hər dəqiqəsində saatın ya da
Qətl törədilir, qızıl qan axır,
Bu an Tanrı hara görəsən baxır?

 +

Qaranlıq bucaqda, kol dibində ya,
Qatil qurbanını çəkir daldaya,

İldırım tək iti bıçağın ağzı

Ürəyə sancılır, kəsir boğazı.

 +

Ölür qız uşağı, oğlan uşağı,
Ölür göz işığı, ev yaraşığı.

Doğranıır qarı da, sütül gəlin də,
Qatil var hər tində  — tiyə əlində.

+
Hər şeyi görənsən, sən özün dedin,

Tanrım, hər qətli də görürsən yəqin.

Görürsən qızıl qan necə fışqırır,
Yəqin eşidirsən qışqırıqları.

 +

Qurbanlıq qoç göndər, Tanrı, qatilə,

Azsa, qurbanını bir sürü elə,

Bir ilxı at göndər, dəvə də göndər,
Qatilin əlini geriyə döndər.

 +

Görsən ki. nə versən, yumşalan deyil,
Çalacaq tiyəni indicə qatil,
Onda əllərini hökm edib qurut,

Sənin varlığına qoy görək sübut…

 

27. 07. 2023, Samara

ALİ BAŞ KOMANDANIN «QUBAD ÇASTUŞKALARI»

Июл26

İlham Əliyev 4

Həbsi mənlik deyil qəti,
Qubad İbadoğlunun.

O “Bir gəncin manfesti”,
Kitabına and olsun!

 +

Görməmişəm onu heç vaxt,

Barda ya kazinoda.

Nə aşıq atmaq, nə də kart,

Udam ya uduzam da.

Eyy! Uxx!

 +

Bildim tutulandan sonra,
Adı nə, soyadı nə.

Ünsürlərsə yaxır qara,

Böhtan atırlar mənə.

 + 

O, cinayət törədibdir,

Təxribata da gedib.

DTX-da görüb tədbir,
Güdüb onu həbs edib.

Eyy! Uxx!

+

Qubad İbadoğlu kimsə,
Saxta pul da kəsənmiş

Yalnız dollar, avro kəsib,

Manatı bəyənməmiş.

 +

Elə bundan bilinir ki,

Antimillidir qoçaq.

Gücdən salmaq olub fikri,
Manatımızı ancaq.

Eyy! Uxx!

 +

Məlum olub pul kəsəndir,

Qubadla arvadı da,

Dolu-dolu kisələrdən,
Çıxıb yuan, avro da.

 

“Bir gəncin manifesiti”nə
And olsun ki, dünyada,

Mən ən böyük humanistəm –

Dəyməmişik arvada.
Eyy! Uxx!

 +

İndi  BMT-yə də həm,

Üz tuturam yenidən.

Azadlıq tələb edirəm,,

Culian Asanja mən!

Eyy! Uxx!

26. 07. 2023, Samara

ZABİL PƏRVİZİN SEVİMLİ ŞAİRİ SEYİD ƏZİMƏ NƏZİRƏ

Июл23

20230721_135628

“Zülfünü bas yarama, qoyma məni qan aparır”,
Talışın dağlarını, zənn elə, leysan aparır.

+

Təcili yardıma zəng vur ya da, zalım balası,

De günahkarsan özün, söylə canı can aparır.
+

Asta sürsün maşını, şoferə tapşır, qadası,

Cıdıra var çıxanı, guya ki, heyvan aparır.

+

Ona anlat gözəlim, millətin fəxarətiyəm,
Özü də fəxr eləsin gör necə insan aparır!

+

Cərrahın bas cibinə, at ya da pul kartına sən,

Başimi yoxsa kəsər, guya ki, qurban aparır.

+

Səy elə faciəmi bilsin əlahəzrət də,

Xəbəri, kaş eşidəydim ki, Mehriban aparır.

+

Seyyidin sevgisi daim məni Şirvana çəkər,
Alaraq könlümü, neynim, yenə Səlyan aparır.

23. 07. 2023 Samara

ALİ BAŞ KOMANDANIN MƏTBUAT ÜÇÜN ÇASTUŞKALARI

Июл22

İlham Əliyev 4

Mətbuat günüdür, elim,

Yeyin-için doyunca!

Ünsür olub antimilli,

Hərçənd Zərdabi məncə.

Ey,  uh!

Xalq tanıyırdı öndəri,

Həm də güclü yazan tək,
Yoxdu tayı-bərabəri,
“Kommunist” qəzetində.

 +

Səhər-axşam AZTV-də,

Əziz qonaqdı öndər,
Yorulmazdı, usanmazdı,

Danışaydı nə qədər.

Ey, uf!

+

Televizor önündə el,
Yuxuya da gedərdi,
Şirin diliylə elə bil,

Öndər layla deyərdi.

 +

Mən özüm də jurnalistəm,
Mənimkidir bu bayram.

Atam olub mənim ustam,

İndi özüm atayam.

Ey, uff!

+

Atasıyam hər yazanın ,
Hər ağız açanın da,

Məndədir icazə, izn,
Ev hədiyyəsi, ad da.

 +

Mənəm cəza verəni də,
Yazanın, danışanın.

Ayıraram bədənindən,
Müxalifin başını.

Eyy, uff!

+

Əlbəttə, bir zarafatdır,
Cəza-məza, baş-bədən,
Zülmkarlıq mənə yaddır,

Liberalam axı mən.

 +

Jurnalistə, hamı bilir,
Həm dostam, qardaşam həm,.

Hamısına özüm bir-bir,
Mesaj gərək göndərəm.

Eyy, uff!

+

Şəxsən Əvəz Zeynallıya,

Təbrik yazdım bu səhər.

Bir şüşə də Koka-Kola,
Göndərdim ki, kef elər…

Ey, ax, ey, uh!

 

22.07. 2023, Samara

«DEYİRDİN GƏLƏRSƏN, SƏRHƏD AÇILSA…»

Июл21

20230721_135628

Mədinə Gülgünün şeirinə nəzirə

Deyirdin gələrsən sərhəd açılsa,
Sərhəd açılmadı, sən gəlməz oldun.

Minib təyyarəyə gəlməyə pulsa,
Heyf, tapılmadı, sən gəlməz oldun.

 +

Dedin AXCP alınsa qeydə,
Borc alıb gələrsən, sən gəlməz oldun.

Nə Cəbhə alındı, Müsavat nə də,
Düşüb bəlkə dərdə, sən gəlməz oldun.

 +

MİQ imtahanına dedin gələrsən,
Yaxşı keçsə əgər —  sən gəlməz oldun.

Müəllimləri kaş görməyəsən sən,

Kəsilib getdilər, sən gəlməz oldun.

 +

Deyirdin qiymətlər əgər bazarda,

Düşərsə, gələrsən, sən gəlməz oldun

Qiymətlər düşmədi, artdı da hətta,
Eşidib bilərsən, sən gəlməz oldun.

 +

Dedin “dəmir yumruq” məmura əgər
Dəyərsə, gələrsən, sən gəlməz oldun.

Hələ ki, bu yumruq milləti əzər,
Bəlkə bu səbəbdən sən gəlməz oldun.

 +

Dedin Söyüdlüdən post götürülsə,

Qanad bağlayarsan, sən gəlməz oldun.

Post nədir, salıblar kəndi qəfəsə,
Görüb ağlayarsan, sən gəlməz oldun..

 +

Dedin millət əgər qalxsa ayağa,

Dəstəksən bir yandan, sən gəlməz oldun

Millət boynubükük, başı aşağı,
Xəbər tutub bundan, sən gəlməz oldun…

Mirzə TƏBİL

21. 07. 2023, Samara

“YADDAŞ ADLI XƏZİNƏN GEDƏ, QALASAN AĞLAR…”

Июл20

U LENİ. KİNO

 Rahat ölənlərin də guya öz yatağında,
Fərqlənmir ölümləri o qədər də qətldən.

Yuxudan ayılmadan ölsən də, ya qəfildən,
Məşəqqətin bitməyib ölüm ayağında da.

 +

Sarsıdılır ayağın, əlin də sarsıdılır,
Danışmaq çətinləşir, əyilməsə də ağzın,

Min hoqqadan çıxırsan, azalmır ancaq ağrın,
Bütün tələbatların kimdənsə asılıdır.

 +

Zindana dönür otaq, qəfəsə dönür yataq,

Səkməyin, uçmağın yox, daha qıvraq deyilsən,

Pəncərədən baxırsan, boynunu bura bilsən,

Dustaqlıq yaşayırsan sanki qətldən qabaq.

 +

Vay halına üstəlik qarət də ediləsən,
Ən qiymətli nəyin var, alına, aparıla,
Yaddaş adlı xəzinən gedə, qalasan ağlar,
Niyə ağladığını ancaq bilməyəsən sən.

 +

Tanrı dəftərindədir nə etsək, nə törətsək,

Bəs bizə edilənlər? Elə buna görə mən,

Şəxsiyyəti müəyyən olunmamış şəxsdən,

Fikrim var bir ərizə göylərə yazam gərək…

 

20. 07. 2023, Samara….