Altında tarixi olsa da şeirin,
Təzəsi-köhnəsi olmasın gərək,

Havanın və suyun, göyün və yerin,
Tarixi, mənşəyi bilinməyən tək.

Hər misra labüd və zəruri ola,
Misrada hər biri sözün eləcə.

Hər səsin, hecanın düz yeri ola,

Rəvan axıb gedə, su axır necə.

Doğa zərurətdən gərək qafiyə,
Hər biri qənimət, şikar, tapıntı.

Ona alternativ axtaran deyə:

Vur, öldür özünü – yox variantı…

Sintaksisdə kamil arxitektura

Ola, oxucunu hətta sarsıda.

Təzə, gözlənilməz hər metafora —

Sözləri tanış və adi olsa da.

Sonda razı qalsan əgər işindən,

Altında tarixi göstər hər halda.
Yaşı yox əsərin (əsərsə) hərçənd,

Necə ki, yaşsızdır su da, hava da….

25.09. 2026, Samara