Pasportum cibimdə, ağlım başımda,

Biletim alınıb, pulumdan qalıb.

Vağzal meydanında düşüb maşından

Qatara minərəm, düşərəm yola.

 

Sərhədi keçəndə neçə poqonlu,

Ruhuma tüpürər, cibimi eşər.

Başsız atlı kimi çapar vaqonlar,

Təbiət dəyişər, ölkə dəyişər.

 

Sahmana salaram yatacağımı,

Sonra girişərəm yol yeməyinə.

Ağac-uğacına, ot-ocağına,

Yolların baxaram, gözüm göynəyər.

 

Zəifləyər, batar təkərin səsi,

Yüz yerdən ucalan xorultularda.

Donuq pəncərədə ay gülümsəyər —

Min il yol gedəsən duracaq orda.

 

31.08 — 04.09.08

                                                           Ərəbqardaşbəyli